Memleket basshysy Almaty qalasynyń ákimin qabyldady

ASTANA. 30 sáýir. Qazaqstan Prezıdenti Nursultan Nazarbaev Almaty qalasynyń ákimi Baýyrjan Baıbekti qabyldady. Bul týraly akorda.kz-ke silteme jasaǵan egemen.kz tilshisi habarlady. Kezdesý barysynda Memleket basshysyna Baýyrjan Baıbek Almaty qalasyn damytý jónindegi keńeste berilgen tapsyrmalardyń oryndalýy týraly baıandady. Atap aıtqanda, ákimdik ál-Farabı kóshesinen joǵaryda ornalasqan qurylystar qabatyn shekteý jóninde qaýly qabyldap, «Medeý» taýly sport kesheni men «Shymbulaq» taý shańǵysy kýrortynyń aýmaǵyna avtomobılderdiń kirýine tyıym saldy. Bul rette ekologııalyq taza kólik túrlerine kóshýdi yntalandyrý maqsatymen elektromobılderdiń ótýine ruqsat etildi. Qalany sapaly aýyl sharýashylyǵy azyq-túlik ónimderimen qamtamasyz etý aıasynda keshendi sharalar júzege asyrylýda. Máselen, «Atameken» ulttyq kásipkerler palatasynyń qoldaýymen óńiraralyq kooperasııany damytý jumystary júrgizilip jatyr. Sonymen qatar, kólik jáne saýda ınfraqurylymdaryn keńeıtý maqsatymen nysandar salynýda. Bular kókónister baǵasynyń maýsymdyq qubylmalylyǵyn azaıtýǵa múmkindik beredi. Alataý aýdanynda jylyjaı keshenin salý jónindegi joba aıaqtalyp keledi, ol syrttan ákelinetin qyzanaqqa degen suranysty 75 paıyzǵa tómendetýge múmkindik beredi. El óńirleriniń qoldaýymen bıyl qalada 800 aýyl sharýashylyǵy jármeńkesin ótkizý josparlanyp otyr. Sondaı-aq, qala ákimi «Almaty-2020» baǵdarlamasyn júzege asyrý, PIK-terdi reformalaý, Almaty aglomerasııalyq beldeýinde jańa jumys oryndaryn ashý jóninde qabyldanyp jatqan sharalar týraly baıandady. Sonymen qatar, memlekettik organdardyń halyq aldyndaǵy eseptiligi qamtamasyz etildi, negizgi máseleler qala turǵyndarymen birlesip talqylandy, qoǵamdyq keńes otyrysy ótkizildi. Memleket basshysy kezdesý qorytyndysy boıynsha birqatar naqty tapsyrma berdi. Talǵat Raıymbek. Derek, foto: akorda.kz.