«ÁLEM. HHI ǴASYR» MANIFESI.
Ortalyq kommýnıkasııalar qyzmetinde Elbasynyń «Álem. HHI ǵasyr» manıfesine arnalǵan brıfıng ótti. Oǵan Parlament Májilisiniń depýtaty Ahmet Mýradov pen Energetıka mınıstrligi Atom jáne energetıkalyq qadaǵalaý men baqylaý komıteti tóraǵasynyń orynbasary Tımýr Jantıkın qatysyp, manıfestiń mańyzdylyǵy jaıynda aıtyp berdi.
A.Mýradovtyń aıtýynsha, Memleket basshysynyń manıfesi arqyly álemdik qoǵamdastyq kezekti ret Qazaqstannyń beıbitsúıgish el ekenine kóz jetkizdi. «Qazirgi tańda ıadrolyq qarýǵa ıe bolý álemdik turaqtylyqqa tikeleı qaýip tóndirýmen birdeı. Sondyqtan qarýsyzdanýdyń mańyzy zor.
Osyny eskergen Nursultan Nazarbaev óziniń manıfesi arqyly álemdi beıbitshilikke shaqyrdy.
Mundaı bastama kóterýge bizdiń Elbasynyń tolyq moraldyq quqy bar. Sebebi, Prezıdentimiz ıadrolyq qarýdan bas tartyp, synaq alańyn jabý arqyly qarýsyzdanýdyń eń jarqyn úlgisin kórsetip berdi. Sondaı-aq, qazaq dalasynda boı kótergen «Semeı-Nevada» antııadrolyq qozǵalysy álemdik deńgeıde qoldaý taýyp, sonyń nátıjesinde 5 ıadrolyq polıgon jabyldy», – degen Májilis depýtaty manıfestiń bul joly da aýyr júk arqalaǵanyn atap ótti. Sonymen qatar, A.Mýradov Elbasynyń álemdik arenadaǵy abyroı-bedeliniń arqasynda Qazaqstan kelisim men turaqtylyqtyń sımvoly jáne ártúrli jahandyq mańyzy bar basqosýlar ótetin tıimdi alań retinde tanylyp úlgergenin tilge tıek etti. Bul jóninde ol: «Elbasy óz manıfesinde jahan elderin qaýipsizdik jóninde keńesý úshin Qazaqstanǵa shaqyryp, álemge qaýip tóndirip turǵan kıberterrorızm máselesinde talqylaıtyn tustardyń kóp ekenine erekshe nazar aýdardy. Búginde bul usynys álemdik qoǵamdastyq tarapynan laıyqty qoldaý taýyp, oń pikirler aıtylýda. Bunyń bári beıbitshiliktiń jarshysy bolǵan Qazaqstannyń osyǵan deıingi ıgi isteriniń nátıjesi»,– dedi. Odan bólek, Májilis depýtaty atalǵan manıfestiń BUU-nyń resmı qujaty bolyp bekitilgenine nazar aýdaryp, bul qadam barsha qazaqstandyq úshin kezekti jeńis bolyp sanalatynyn aıtty.
О́z kezeginde T.Jantıkın manıfestiń basty maqsaty Jer betinde beıbitshilikti saqtap, bolashaq urpaqqa turaqty, gúldengen, órkenıetti álemdi amanat etý ekenin jetkizdi. «Qazir jahandyq geosaıası ahýaldyń turaqsyzdanýyna óz máselelerin kúsh qoldaný arqyly sheship úırenip qalǵan belgili bir toptardyń áreketteri sebep bolýy múmkin. Bul jerde birinshi kezekte ıadrolyq qarýy bar memleketter men kózdegen maqsatyna jetý úshin kez kelgen qadamǵa barýǵa daıyn terrorıstik toptar eske túsedi. Mine, Elbasy álemniń nazaryn osy máselege aýdarý arqyly, bul túıtkildiń qanshalyqty ózekti ekenin, ony eshqashan kún tártibinen tys qaldyrýǵa bolmaıtynyn aıtty», – dedi komıtet tóraǵasynyń orynbasary.
Odan bólek, brıfıng barysynda Tómen baıytylǵan ýran bankiniń Qazaqstanda qurylý jaıy sóz boldy. T.Jantıkınniń sózine qaraǵanda, bul joba negizinen ıadrolyq qarýdan tónetin qaýiptiń aldyn alýǵa baǵyttalǵan. Al ony júzege asyrý úshin Qazaqstannyń tańdalýynda memlekettiń óz ótinishi eskerilgen. Sebebi, bizdiń bul saladaǵy mol tájirıbemiz jemisti jumys isteýge múmkindik beredi.
Elaman QOŃYR,
«Egemen Qazaqstan»
