«Sarbaz» saparǵa ázir

Áskerı maqsattaǵy otandyq keme jasaý óndirisi jańa sapalyq kezeńge aıaq bas­ty. Bul tujyrymǵa Oral qalasyndaǵy «Zenıt» zaýytynda qurastyrylǵan salmaǵy 250 tonna raketalyq-artıllerııalyq ko­­rab­l kýá. Ony jasaýǵa 200-den astam maman tartylǵan. Atalǵan korabldiń buǵan de­ıingi óndiris jelisinen sýǵa túsirilgen kemelermen sa­lys­­tyrǵandaǵy basty aıyr­ma­shy­lyǵy, óz ataýynan kórinip tur­­ǵanyndaı, eń sońǵy úlgidegi ar­tıllerııalyq qurylǵymen jab­dyq­talǵany ári jaýyngerlik mo­dýlder men radıotehnıkalyq qarýlar ornatylǵany. Elimizdegi shekara qyz­metiniń suranysyna sáıkes quras­ty­rylǵan kemege  «Sarbaz» degen ataý qoıylǵan. Shekaralyq ko­rabldiń uzyndyǵy 42 metr bolsa, eni 7 metrge deıin jetedi. Otan­­­dyq keme qurastyrýshylar TMD aýmaǵynda balamasy joq ózderiniń bul ınjenerlik-kons­trýktorlyq eńbegi men ónimin Táýelsizdiktiń 25 jyldyǵyna arnap otyr. Bul – rettik sany bo­ıynsha «Zenıtten»  Kaspııge memleketimizdiń teńizdegi múd­de­lerin qorǵaýǵa attanatyn 24-shi korabl. «Búgingi kún – mem­leketimizdiń aıbynyn asyra ala­tyn tarıhı kún. Sondyq­tan, «Sar­baz» kemesimen teńiz­ge at­­­­tan­ǵaly otyrǵan shekara saq­shylaryna aq jol tileımin», – dedi kemeniń Shaǵan ózenine túsirilý rásimi kezinde Batys Qa­zaq­­­stan oblysynyń ákimi Altaı Kólginov. «Zaýyt mamandarynyń qoly­nan shyqqan jańa korabldiń atqaratyn qyzmetin tek teńizdegi shekarany qorǵaýmen shekteı salýǵa bolmaıdy. Sonymen birge, bul besaspap kemeniń qosym­sha qurylǵylary. Salmaǵy 170 ton­naǵa deıingi aýyr júkterdi tasymaldaýǵa da múmkindikter týǵyzady. Árıne, bul – biz úshin úlken jetistik. Osyndaı kúrdeli mindetti ıgere alǵanymyz úlken mereı. Keme óndirisin odan ári jań­ǵyrtý jónindegi joba aıasynda budan da joǵary synyptaǵy korablder qurylysyn meńgerýdi, salmaǵy 600 tonnaǵa deıingi ma­mandandyrylǵan kemeler men júzý quraldaryn shyǵarýdy oılastyryp otyrmyz», – dedi gazet tilshisine zaýyt dırektory Vıacheslav Valıev. Elimizdiń shekaralyq qyz­meti bas shtaby jaǵalaý kúzeti bas­­qarmasynyń bastyǵy Sa­byr Hasanovtyń aıtýynsha, el Prezıdenti qol qoıǵan mem­lekettik shekarany damytý men bekemdeý jónindegi keshendi josparǵa sáıkes, 2018 jylǵa deıin «Sarbaz» úlgisindegi taǵy da birneshe korabl men jyldam júzetin ushqyr katerler qurastyrylmaq. Munyń ózi Kaspıı teńizindegi elimizdiń qaýipsizdigin kúsheıtýge eleýli septigin tıgizbek. Munyń bá­ri negizinen zenıttikterdiń kú­shimen atqarylmaq. Osy ara­da olar teńizdegi shekara qyz­metinde júrgen korablderge ártúrli tehnıkalyq qyzmetter kórsetetinin de aıta ketken jón. Sonymen, «Sarbaz» sýǵa tú­sirildi. Budan ári ol Jaıyq ózeni arqyly Kaspıı teńizine qaraı baǵyt almaq. Endeshe, iske sát demekpiz. Temir QUSAIYN, «Egemen Qazaqstan»  ORAL Sýrette: «Sarbaz» áskerı ke­mesi