Palýan Elaman Erǵalıev «Syr barysy» atandy

ASTANA. 3 mamyr. Qyzylorda qalasy Qazaqstan Respýblıkasy Táýelsizdiginiń 25 jyldyǵyna arnalǵan qazaq kúresinen oblystyq «Altyn belbeý» jarysynyń fınaldyq kezeńi máresine jetti. Bul týraly egemen.kz tilshisi habarlady. «Altyn belbeý» jarysy bir aıdan astam ýaqytqa sozyldy. Boz kilemdegi palýandar úsh kezeń boıynsha tórt jas deńgeıinde synǵa tústi. Birinshi kezeń aýyl arasynda ótkizilip, oǵan 5 731 sportshy qatysty. Ekinshi kezeń aýdan, qala arasynda ótti. Bul jarystarda 1 476 sportshy baq synassa, fınaldyq saıysqa 279 palýan qatysty. Barlyǵy úsh kezeńge bólinip ótken jarysta 7 486 sportshy kúsh synasty. «Altyn belbeý» jarysy óte tartysty ótti. О́ıtkeni, árbir palýannyń beldesýge tyńǵylyqty daıyndyqpen kelgeni kórinip turdy. Túıe palýan saıysyna 19 sportshy qatysty. Olardyń arasynda qarmaqshylyq Elaman Erǵalıev «Syr barysy» atandy. Oǵan «Altyn belbeý» beldigi men 1 mln. 300 myń teńgeniń sertıfıkaty tabys etildi. «Syr arlany» tıtýlyn ıelengen jalaǵashtyq Rýslan Ábdirazaqovqa 700 myń teńgeniń sertıfıkaty berilse, «Syr suńqary» - araldyq Nurym Sálimgereevke 400 myń teńgeniń sertıfıkaty tapsyryldy. Jarysta kishi jasóspirimder arasynda Jalaǵash aýdanynyń sportshylary jaqsy qyrynnan tanyla bildi. Al jasóspirimder arasynda Aral aýdany men Qyzylorda qalasynyń jetkinshekteri ózderiniń myqtylyqtaryn baıqatty. Jastar men eresekter arasynda Qarmaqshy aýdany, Qyzylorda qalasynyń palýandary da birneshe júldeni ıelendi. 3 shilde kúni Astana qalasynda Qazaqstan Respýblıkasy Prezıdenti júldesi úshin ótetin «Qazaqstan barysy» respýblıkalyq týrnırine Qyzylorda oblysynan Elaman Erǵalıev pen Rýslan Ábdirazaqov oblys namysyn qorǵaıtyn bolady. Dastan Kenjalın. Derek, foto: Shtattaǵy ulttyq komandalar jáne sport rezervi dıreksııasy.