Kók tý arab aspanynda jelbiredi

Taǵy da jeńis! Qazaq eliniń mereıin tasytqan, qarsylastardyń jigerin jasytqan taǵy bir jarqyn jeńiske qol jetti. Bul jeńis jalǵyz kelgen joq. Aýyr salmaq boıynsha álem chempıony altyn medalimen qatar, absolıýttik álem chempıony altyn medalin de qosa aldy. Ol – astanalyq sportshy Qýanysh Qabyldın. Sáýir aıynyń 17-si men 22-si aralyǵynda BAÁ astanasy Abý-Dabıde djıý-djıtsýdan álem birinshiligi ótipti. Onda jattyqtyrýshy Qanat Álın bastap barǵan qazaqstandyq sportshylar komandalyq jarysta úshinshi oryndy jeńip alǵan. «Brazılııadan shyqqan bul sport túri qazir búkil álemge keńinen jaıylyp barady. Naǵyz erler shaıqasatyn alań. Ásirese, BAÁ-de djıý-djıtsý qatty damyp keledi desek bolady. Bul sport túrimen bizdiń eldiń azamattary kóp tanys bolmaýy múmkin. Sondyqtan, qysqa qaıyryp túsindirgende, djıý-djıtsý jalpyǵa málim dzıýdoǵa kóp uqsaıdy», dedi chempıon. Áýejaıdaǵy abyr-sabyr da djıý-djıtsý sportynyń anyq-qanyǵyna báribir qanyǵa almaǵan soń ınternetke júgingenimiz ras. Onda kórgenimiz boıynsha, bul sport túri dzıýdoǵa qaraǵanda áldeqaıda kúrdeli ári qaýipti ekenin baıqadyq. Sebebi, basy kádimgi shyǵys jekpe-jegi sııaqty bas­talyp, aıaqpen teýip, qolmen urýdyń neshe túrin qoldanady. Sáti túskende qoıan-qoltyq bel­dese ketip, qarsylasyn alyp urady eken de, turǵyzbaı tastaýǵa áreket etedi. Al jerde jatyp bolatyn aıqasta bir-birin barynsha tunshyqtyryp, qol-aıaǵyn burap jeńilgenin moıyndatýǵa aıamaı májbúrleıdi eken. Al endi búgingi batyrǵa qaıta oralsaq, ol aýyr salmaqta alty qarsylasyn alyp uryp, talassyz kúsh ıesi ekenin moıyndatyp baryp jeńis tuǵyryna kóterilgen. Nátıjesinde absolıýttik chempıonatqa qatysýǵa usynys túsken. Uıymdastyrýshylar men kórermenniń qyzý qoldaýyna ıe bolǵan qazaqstandyq sportshy óz kelisimin berip, bul jarysta 12 alyppen jekpe-jekke túsip, bárin de tize búktiredi. Sóıtip, bir jarysta eki birdeı altyn medaldy ıelenip, el mereıin tasytady. Nurbaı ELMURATOV, «Egemen Qazaqstan»