«Atletıko» Chempıondar lıgasynyń fınalyna shyqty

ASTANA. 4 mamyr.  Búgin Madrıdtiń «Atletıko» klýby jankúıerlerine tamasha syı jasady. Komanda ÝEFA Chempıondar lıgasynyń jartylaı fınalynda Mıýnhenniń «Bavarııa» klýbynan 2:1 esebimen jeńilse de eki oıynnyń nátıjesi boıynsha fınalǵa shyqty. Bul týraly egemen.kz tilshisi habarlady. Bul – Ispanııa klýbynyń úshinshi ret Chempıondar lıgasynyń fınalyna shyǵýy. Buǵan deıin «Atletıko» 1974 jyly Eýropa chempıondary kýbogynyń fınalyna shyǵyp, «Bavarııadan» 4:0 esebimen utylsa, 2014 jyly jerlesteri «Real» komandasynan 4:1 esebimen jeńilgen  bolatyn. Degenmen komanda eki ret Eýropa lıgasynyń fınalynda oınap, ekeýinde de jeńimpaz atanǵan. Odan qaldy ÝEFA Sýperkýbogyn da eki ret utqan. Rasyn aıtý kerek, «Atletıkonyń» bıylǵy fınalda oınaýǵa eńbegi sińdi. Argentınalyq jattyqtyrýshy Dıego Sımeoneniń komandasy toptyq týrnır bastalysymen jaqsy oıyn órnegin kórsetip, álemniń túkpir-túkpirindegi mıllıondaǵan jankúıerlerdiń ystyq yqylasyna bólenip keledi. Chempıondar lıgasynyń jartylaı fınaly da osyny taǵy bir ret kórsetti. Búgingi matchta «Atletıko» syrt alańda «Bavarııadan» 2:1 esebimen jeńilgenimen, Madrıdte bolǵan matchta óz alańynda soqqan jalǵyz goldyń esebinen fınalǵa shyqty. Ekinshi kezdesýde «Bavarııa» fınalǵa shyǵýǵa jantalasyp, eki dop aıyrmashylyǵymen jeńýge tyrysty. Alań ıeleriniń Levandovskı, Rıberı, Mıýller, Vıdal syndy oıynshylary qanshama ret qarsylastar qaqpasyna qaýipti jaǵdaı jasaǵanymen onysynan eshteńe shyqpady. 74 mınýtta Levandovskıdiń soqqan goly da alań ıelerin qutqara almady. «Atletıko» match sońyna deıin qorǵanysta jatyp alyp, esepti ustap tura aldy. Endi búgin Madrıdte ekinshi fınalıst anyqtalady. «Real» «Manchester Sıtı» komandasymen kezdesedi. Eger alań ıeleri jeńse, Chempıondar lıgasynyń fınalynda bir eldiń ǵana emes, bir qalanyń komandalary kúsh synasady. ÝEFA Chempıondar lıgasy 1/2 fınalyndaǵy qarsylastardyń ekinshi matchy. 3 mamyr. Mıýnhen. «Allıans Arena» stadıony.   Tóreshi: Chakyr Djıýneıt. «Bavarııa»:Noıer, Lam (kapıtan), Boateng, Martınes, Alaba, Alonso, Vıdal, Kosta (Koman 73’), Mıýller, Rıberı, Levandovskı «Atletıko»(Madrıd): Oblak, Hýanfran, Hımenes, Godın, Lýıs, Nıges, Gabı (kapıtan), Aýgýsto (Ferreıra-Karrasko 46’), Koke, Torres, Grızmann Goldar: Alonso 31’, Levandovskı 74’– Grızmann 54’, Eskertý aldy: Hımenes 34’ Dastan Kenjalın. Derek, foto: eurosport, euro-football.ru, EPA/URG Vıdeo: vkontakte áleýmettik jelisi.