PETROPAVL. 4 mamyr. Soltústik Qazaqstan oblysynyń tilderdi damytý jónindegi basqarmasy Qazaqstan Respýblıkasynyń Omby qalasyndaǵy konsýldyǵynyń qoldaýymen «Onlaın rejimi arqyly qazaq tilin oqytýdyń tıimdi joldary» degen taqyrypta semınar ótkizdi. Sharanyń basty maqsaty – osynda turatyn qandastarymyzdyń ulttyq-mádenı avtonomııasyna ádistemelik kómek kórsetý. Bul týraly Soltústik Qazaqstan oblysynyń tilderdi damytý jónindegi basqarmasynyń baspasóz qyzmetine silteme jasaǵan egemen tilshisi habarlady.
El Táýelsizdiginiń 25 jyldyǵy qarsańynda uıymdastyrylǵan shara F.M.Dostoevskıı atyndaǵy Omby memlekettik ýnıversıtetinde ótti. Onyń aldynda qazaq tilin oqytý boıynsha oqytý-ádistemelik quraldarynyń kórmesi tamashalandy. Qazaq tilin jáne salt-dástúrlerdi nasıhattaıtyn beınerolıkter kórsetildi.
Semınardyń jumysyna Qazaqstannyń Omby oblysyndaǵy vıse-konsýly Ulan Ábdibekov, saýda ókildiginiń ýákili Sara Mýnaeva, qazaq ulttyq-mádenı ortalyǵynyń ókilderi, F.M.Dostoevskıı atyndaǵy Omby memlekettik ýnıversıtetiniń oqytýshylary men stýdentteri, jergilikti jerdegi mektepterdiń qazaq tili men ádebıeti pánderiniń muǵalimderi qatysty.
Semınar barysynda oblysymyzda jáne elimizde «Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń» júzege asyrylý barysy, qazaq tilin oqytýdyń tıimdi joldary týraly keńinen baıandaldy. Qazaq tilin oqytý boıynsha jańa oqýlyqtar men baǵdarlamalar tanystyryldy. Eki júzden astam oqý quraldary tabystaldy.
Qazaq tili muǵalimderiniń Petropavl qalasynda biliktilikti arttyrý kýrstarynan ótý jónindegi tilekteri qanaǵattandyrylatyn boldy. Qazaq ulttyq-mádenı ortalyǵy janynan qazaq tiliniń qoǵamdyq kitaphanasyn jáne Omby qalasy qazaq tili muǵalimderiniń qaýymdastyǵyn qurý týraly oı-pikirler qoldaý tapty.
О́mir Esqalı.
Derek, foto: Soltústik Qazaqstan oblysynyń tilderdi damytý jónindegi basqarmasynyń baspasóz qyzmeti.
