Máskeý tórinde

Qazaqstan azyq-túlik ónimderiniń dúkeni ashyldy Máskeýde Qazaqstan elshiliginiń jáne Qazaqstannyń Reseıdegi saýda ókildiginiń qoldaý kórsetýimen Qazaqstan azyq-túlik ónimderiniń «Baýyrsaq» dep atalatyn saýda jelileri dúkeni esigin aıqara ashty. Bul bólshek saýdadaǵy besinshi saýda núktesi bolyp tabylady. Dúkenniń ashylý saltanatyna elshiliktiń, saýda ókildiginiń, qazaq dıasporasynyń ókilderi já­ne Máskeý JOO-larynda oqı­tyn qazaqstandyq stýdentter qatys­ty. «Baýyrsaq» jelisiniń qu­ryl­taıshysy Elena Kondakova bylaı deıdi: «Men Qazaqstanda týyp-óskenmin. Biraq Máskeýde turǵanyma 20 jyldyń júzi boldy. Osynda qonys aýdarǵaly beri Qazaqstanda jegen keıbir taǵamdardyń dámi aýzymnan ketpeı, sol shaqtarymdy saǵynyshpen jıi-jıi eske alatynmyn. Qazaqstanǵa ár barǵan saıyn osynda azyq-túlik alyp keletinmin. Sodan soń basyma bir ıdeıa keldi, Qazaqstannyń azyq-túlikterin astanada nege satpasqa degen. Áýelde kórmelerde sata bastadyq, al keıin tutynýshylar azyq-túlikti turaqty negizde jetkizip turýdy ótindi. Sóıtip, mine, biz dúkender asha bastadyq. Suranys ýaqyt ótken saıyn óse túsip otyr. Bizdiń basty erejelerimizdiń biri – tek qana Qazaqstannyń azyq-túlikterin satý. Jylyna bizdiń taýar aınalymymyz shamamen 50 mln. rýbldi quraıdy. Endi bizdiń josparymyzda jańa jeke dúkenderimizdi ashýdan bólek, barlyq qalaıtyndarǵa bizdiń markamyzben saýda-sattyq uıymdastyrýdy usyný bar. Sóz retinde aıtar bolsaq, «Baýyrsaq» birte-birte brendke aınalyp keledi. Adamdar bizdi búginde Qazaqstannan azyq-túlik ákelýshiler dep qana emes, ataýymyz boıynsha,  ıaǵnı «Baýyrsaq» dep izdeıtin boldy». Endi Qazaqstan Respýb­lıka­synyń Reseı Federasııasyndaǵy saýda ókiliniń orynbasary Gúljan Bodyqovanyń áńgimesine qulaq túreıik. «Sońǵy kezderi Elshilik jáne Saýda ókildigi taraptarynan Qazaqstan taýarlaryn Reseı naryǵyna ilgeriletý boıynsha belsendi jumys júrgizile bastady. Bizdiń taýarlarymyzdyń úlken suranysqa ıe ekenin aıta ketkenniń artyqtyǵy joq. Suranys pen satý kólemi boıynsha óte jaqsy serpin  baıqalady. Qazaqstandyq kásipkerlerge Reseı naryǵyna shyǵýdyń osyndaı jaqsy múmkindigin jiberip almańdar, al Saýda ókildigi buǵan oń yqpal etýge ár kez ázir ekenin aıtqym keledi», – deıdi G.Bodyqova. «Baýyrsaq» saýda jelisi Máskeý qalasy men oblysyna Qazaqstannan azyq-túlik ónimderin jetkizýmen jáne satýmen 2012 jyldan bastap aınalysyp keledi. Reseı naryǵynda tórt jyl jumys istegen kompanııa Qazaqstannyń «Rahat», «Baıan Sulý», «Almaty ónimi», «Kon­dıterlik buıymdar», «Ses­na», «Lııa», «Kemmı», «Kýb­leı», «Semeı et kombınaty», «Ome­ga dámdeýishteri», «Beles», «Rah­met», «Imanov ónimderi», «Trape­za», taǵy basqa, shamamen 30 shaqty qazaqstandyq óndirý­shi­lermen tabysty yntymaqtastyq qalyptastyryp úlgergen. Sáýlebek BIRJAN