Seriktestiktiń jańa kezeńi

Jaqynda 2015 jylǵy 21 jeltoqsanda qol qoıylǵan Qazaqstan men Eýropalyq odaq arasyndaǵy Keńeıtilgen áriptestik pen yntymaqtastyq týraly kelisiminiń (KÁYK) keıbir erejeleriniń ýaqytsha qoldanylýy bastaldy. 2016 jylǵy 25 naýryzda Qazaqstan Respýblıkasynyń Prezıdenti Nursultan Nazarbaev kelisimdi ratıfıkasııalaý týraly zańǵa qol qoıǵan bolatyn. Eýropa tarapynyń resmı habarlandyrýyna sáıkes, ýaqytsha qoldanysqa tek Eýropalyq komıs­sııa­nyń quzyretine jatatyn erejeler enedi. Olardyń arasynda syrt­qy saıasat pen qaýipsizdik, demokratııa­landyrý jáne zań ústemdigin qam­ta­masyz etý, ekonomıkalyq jáne tu­raqty damý, saýda, energetıka, kólik, qorshaǵan ortany qorǵaý, aýyl sha­rýashylyǵy jáne basqa salalar bo­ıynsha yntymaqtastyq máseleleri bar. Kelisim tolyq kúshine Eýro­palyq odaqqa múshe barlyq 28 memlekettiń ulttyq parlament­terinde ratıfıkasııalaýdan ótken­nen keıin enedi. Oǵan deıin 1995 jylǵy Qazaqstan men Eýropalyq odaq arasyndaǵy áriptestik pen yntymaqtastyq týraly kelisim óz kúshin saqtaıdy. Qazaqstan – Eýropalyq odaq­pen osyndaı ekinshi býyndaǵy kelisimge qol qoıǵan Ortalyq Azııadaǵy birinshi memleket. Jańa kelisim árekettestiktiń shegin 29 salaǵa deıin keńeıtip, Qazaqstannyń Dúnıejúzilik saýda uıymyna qosylýyn jáne Eýrazııalyq ekonomıkalyq odaqqa múshe el bolýyn eskerýmen qatar, Qazaqstan men Eýroodaq ara­syn­daǵy saýda-ekonomıkalyq jáne ınvestısııalyq ynty­maq­tas­­tyqtyń jańa múmkindikterin ashady. Keńeıtilgen áriptestik pen yntymaqtastyq týraly kelisimge qol qoıylýy Qazaqstan men EO arasyndaǵy qarym-qatynastardy damytý men  nyǵaıtýdaǵy mańyzdy qadam bolyp, yntymaqtastyqtyń jańa deńgeıge ótkendigin aıqyn­daıdy. Syrtqy ister mınıstri Erlan Ydyrysov 2016 jylǵy 29 sáýirde «Egemen Qazaqstan» gazetinde jarııalanǵan óziniń maqalasynda atap ótkendeı, «Eýroodaqpen jańa kelisim eýropalyq ınstıtýttarmen de, Eýropa memleketterimen de barlyq deńgeıde ári qaraı yntymaqtasýdy tereńdetýdiń berik negizin qalaıdy, sondaı-aq, Qazaqstannyń odan ári saıası jáne ekonomıkalyq damýynyń qozǵaýshy kúshi bolady». «Egemen-aqparat»