Atyraýda jańa konsorsıým quryldy

ATYRAÝ. 5 mamyr. Atyraýda Qazaqstannyń munaı servıstik kompanııalary odaǵynyń uıymdastyrýymen «Kazneftegazservıs – 2016». Jańa múmkindikter: Munaıgaz qurylysy jáne ınjınırıng» atty 5-shi mereıtoılyq konferensııasynda jańa konsorsıým qurý týraly kelisimge qol qoıyldy. Bul týraly egemen.kz tilshisi habarlady. Konsorsıým RenaissanceHeavyIndustries jáne «Fırma ATK» seriktestiginiń arasynda bekitildi. RenaissanceHeavyIndustries – iri halyqaralyq qurylys kompanııalarynyń biri. Munaı gaz óndirý, óńdeý, munaıhımııa, energetıka, metallýrgııa salasynda ondaǵan sátti jobalardy júzege asyrǵan. Al, «Fırma ATK» seriktestigi 20 jyldyq tarıhy bar qazaqstandyq qurylys kompanııasy. Kompanııa munaı jáne gaz ken oryndarynyń qurylysyn júrgizip, kógildir otyndy tazalaý nysandaryn salý, azamattyq nysandar qurylysyn júrgizgen. «Konsorsıým qurýdaǵy basty maqsat –tıimdi seriktestik arqyly qazaqstandyq úlesti barynsha arttyrýǵa kúsh salý, joǵary deńgeıli halyqaralyq qurylys qyzmetin kórsetý arqyly «Teńizshevroıl» jaýapkershiligi shekteýli seriktestiginiń «Teńiz» kenishinde iske asyrylatyn keleshek keńeıtý jobasyna qatysý. Sonymen birge, Qazaqstannyń munaı servıstik kompanııalary odaǵynyń mańyzdy mindetteriniń birine qazaqstandyq kompanııalardy barynsha munaı gaz jobalaryna tartý da jatady» – dep habarlady Qazzaqstannyń munaı servıstik kompanııalary odaǵynyń baspasóz qyzmeti. Otandyq munaı servıstik kompanııalardy damýdyń jańa deıgeıine qadam basýyna serpin beretin jańa konsorsıým qurý týraly kelisimge «Fırma ATK» kompanııasynyń bas dırektory Jánibek Nuǵmanov pen RenaissanceHeavyIndustries kompanııasynyń vıse-prezıdenti Ahmet Abdýllaev qol qoıdy. Joldasbek Shópeǵul. Derek, sýret: Qazzaqstannyń munaı servıstik kompanııalary Odaǵynyń baspasóz qyzmeti.