Aqtóbede jańa áleýmettik dúkender ashylady

AQTО́BE. 5 mamyr. Aqtóbede jańa áleýmettik dúkender ashylady. Bul týraly «Aqtóbe aqparat» ortalyǵynda ótken baspasóz konferensııasynda «Aqtóbe» ÁKK» UK» AQ basqarma tóraǵasy Qaırat Bekenovtiń aqpary boıynsha egemen.kz tilshisi habarlady. Alǵashqy áleýmettik dúken «Nur Aqtóbe» yqsham aýdanynda bıylǵy jylǵy naýryz aıynda ashyldy. Mundaı dúkenderde tutynýshylar áleýmettik mańyzy bar taýarlardy arzan baǵamen satyp ala alady. Aldaǵy ýaqytta áleýmettik saýda oryndary 12 yqsham aýdanda, sonymen birge «Batys-2» jáne «Bolashaq» yqsham aýdandarynda esikterin aıqara ashatyn bolady. «Qazirgi tańda bizdiń enshiles «Bazarlardy basqarý» JShS balansynda azyq-túliktiń bólshekteme saýdasyn uıymdastyrýǵa arnalǵan 7 shaǵyn bazar men 4 jer telimi bar.  Ol jerde áleýmettik mańyzy bar azyq-túlik túrleri 10 paıyzdyq ústemeaqymen satylady. Sonymen birge, qajettilik týyndaǵanda azyq-túlik turaqtandyrý qorynan jetkizilmek. Biz qoldanystaǵy shaǵyn bazarlardy qaıta salyp, olardyń sanyn oblys ortalyǵyna jaqyn ornalasqan aýyldyq okrýgterdegi turǵyndarǵa arzan baǵamen azyq-túlik alatyndaı múmkindikterdi qarastyrýymyz kerek. Qazirgi tańda Kirpishti, Blagodarnyı jáne Qarǵaly aýyldarynda shaǵyn bazarlar úshin jer telimderi qarastyrylýda», dedi Qaırat Bekenov. ÁKK basshysy aımaqta azyq-túlik qaýipsizdigin qamtamasyz etý jáne azyq-túlikke baǵany turaqtandyrý maqsatynda qazirgi tańda korporasııa tarapynan sharalar qolǵa alynyp jatqanyn jetkizdi. Azyq-túlikti óz baǵasymen kórshiles oblystardan tek Aqtóbe qalasyna ǵana emes, oblys aýdandaryna da jetkizý jaǵy qarastyrylýda. Osy maqsatta «Bazarlardy basqarý» JShS, Aqtóbe oblysy aýdandarynyń ákimdikteri jáne aýdandaǵy operatorlardyń basshylary azyq-túlik taýarlarymen qamtamasyz etý úshin ózara yntymaqtastyq jóninde úsh jaqty memorandýmdarǵa qol qoıdy. Munyń ózi  oblys aýdandaryna taýarlardy naryqtaǵy baǵadan 15-20 paıyzǵa arzanǵa satyp alýǵa múmkindik beredi. Satybaldy Sáýirbaı. Derek: egemen.kz Foto: kerek-info.kz