Elbasy eki mınıstrliktiń óz mindetterin oryndaı almaǵanyn aıtty

ASTANA. 5 mamyr. Aqordada ótken keńes otyrysynda Qazaqstan Prezıdenti Nursultan Nazarbaev eki mınıstrliktiń óz mindetterin oryndaı almaǵanyn málimdedi. Bul týraly nur.kz-ke silteme jasaǵan egemen.kz tilshisi habarlady. Keńes otyrysynda Memleket basshysy jer zańnamasynyń normalaryn túsindirýge mınıstrlerdiń jeke jaýapkershiligin engizdi. «Eki memlekettik organ – Aýyl sharýashylyǵy jáne Ulttyq ekonomıka mınıstrligi jer kodeksi boıynsha jumys júrgizdi. Olar bul mindetti oryndaı almady. Men mınıstrlikter jaman jumys istedi dep aıtqym kelmeıdi. Biraq barlyǵyna túsinikti bolatyndaı, qabyldaıtyndaı óz ustanymyn túsindire almady. Sondyqtan men búgin birqatar sheshimder qabyldaımyn», – dedi Prezıdent. Aıta keteıik, búgingi jıynda Memleket basshysy Ulttyq ekonomıka mınıstri Erbolat Dosaevty qyzmetinen bosatyp, Asyljan Mamytbekovke sógis jarııalady. Talǵat Raıymbek. Derek: nur.kz. Foto: egemen.kz.