Rýdnyı qalasynda polıseıler urylar tobyn ustady

QOSTANAI. 5 mamyr. Rýdnyı qalasynda polıseılerdiń qyraǵylyǵy arqasynda avtomobıl tonaıtyn dánikken urylar toby ustaldy. Bul týraly oblystyq ishki ister departamenti baspasóz qyzmetine silteme jasaǵan egemen.kz tilshisi habarlady. Rýdnyı qalasyndaǵy №256 jol-patrýldyq polısııasynyń quramynda jergilikti polıseı Raýan Nurshataev jáne polısııa aǵa serjanty Elmurat Jaqsylyqov bar avtopatrýli túnde beımezgil júrgen «Lıfan» jeńil mashınasyn toqtatty. Mashına bagajynan 8 akkýmýlıator, vıdeotirkegishter, antıradarlar, navıgatorlar salynǵan sómke tabyldy. Rýdnyı qalasynyń 20 jáne 23 jastaǵy eki turǵyny ustaldy. Olardyń búginde avtomashınalardy tonaýǵa ábden dánikken urylar ekeni anyqtaldy, olardyń qolymen jasalǵan onnan astam urlyq anyqtaldy. Polısııaǵa olar ustalmas buryn túsken aryzdarǵa sáıkes adamdardyń urlanǵan zattary qaıtaryldy. Názıra Járimbetova. Derek, foto: Qostanaı oblystyq ishki ister departamenti baspasóz qyzmeti.