Qurmetti sport qaıratkeri Nurbolat Qanaǵatov 70 jasqa toldy

ASTANA. 5 mamyr. Qazaqstan Respýblıkasynyń qurmetti sport qaıratkeri Nurbolat Qanaǵatov 70 jasqa toldy. Bul týraly egemen.kz tilshisi habarlady. Ol Qazaqstan voleıbolynyń jáne ǵylymynyń damýyna úles qosqan ǵalym ári jattyqtyrýshy.   Nurbolat Qanaǵatov jastaıynan voleıbol sportyna áýes bolǵan. Almatydaǵy Altynsarın atyndaǵy N 2 mektep-ınternatta oqyp júrgende-aq qalalyq voleıbol jarystaryna qatysyp, kózge túsedi. Boıshań, qımyly shıraq, ár soqqysy myǵym jas oıynshyny jattyqtyrýshylar Almaty jasóspirimder komandasyna qabyldanady. Mektepti úzdik bitirgen Nurbolat Qanaǵatovqa qazaq voleıbolynyń atasy Oktıabr Jarylǵapovtyń ózi keńes berip, Qazaqtyń dene tárbıesi ınstıtýtyna (qazirgi-Qazaqtyń sport jáne týrızm akademııasy) jibergen.   “Qazaq aýyl sharýashylyq ýnıversıtetiniń Mehanıka fakýltetine emtıhan tapsyryp, jaqsy baǵa alyp, oqýǵa túsip qoıǵan edim. Keıin Oktıabr aǵa Jarylqapov kelip “myna ýnıversıtetti bitirseń keıin aýylda traktordyń astynda maı-maı bop júresiń, al dene tárbıesi ınstıtýtyn bitirseń men sııaqty galstýk taǵyp júresiń” dep galstýgyn qolymen bir ustap qoıǵan edi. Keıin Oktıabr aǵa qujattarymdy dene tárbıesi ınstıtýtyna tapsyrýǵa kómektesti. Sporttaǵy jetistikterimniń arqasynda ınstıtýtqa emtıhansyz tústim” deıdi mereıtoı ıesi.   Nurbolat Qanaǵatov 1964 jyly ınstıtýtqa túse sala stýdentter quramasyna alynyp, Shymkenttegi iri jarysqa qatysyp, jeńiske jetken. Qanaǵatov tórt jyl boıy ınstıtýttyń voleıbol quramasynyń negizgi quramynda oınaǵan. Instıtýtty qyzyl dıplommen bitirip, sport mınıstrliginiń arnaıy jolamasymen Qazaq polıtehnıkalyq ınstıtýtyna (qazirgi – Sátbaev atyndaǵy Qazaq ulttyq tehnıkalyq ýnıversıteti) jumysqa barady. Sol jyly Nurbolat Qanaǵatov otan aldyndaǵy boryshyn óteýge shaqyrtý alyp, Almaty armııa sport klýbyna jiberiledi. Bul klýbta da ol voleıbol klýbynyń beldi oıynshysy bolǵan.   “Áskerde júrgende Tashkentte Ortalyq Azııa komandalary arasyndaǵy jarysqa baratyn boldyq. Bapkerimiz “Tashkentte jeńiske jetseńder kazarmada emes úıde turasyńdar” dedi. Biz Tashkentte barlyq qarsylastarymyzdy jeńip, jeńiske jettik. Al bapkerimiz ýádesin oryndady” dep eske alady Nurbolat Qanaǵatov.   Áskerden kele sala Qazaq polıtehnıkalyq ınstıtýtyna (qazirgi – Sátpaev atyndaǵy Qazaq ulttyq tehnıkalyq ýnıversıteti) jumysqa turady. Ol ınstıtýtta voleıbol quramasyn qurady. Qanaǵatov qurǵan komanda voleıboldan stýdentter arasyndaǵy Qazaqstan chempıonatyn tórt jyl qatarynan jeńip alady. Nurbolat Telmuhametuly Instıtýtta oqyp júrgende otbasyn qurady. Oqý oryndaǵy voleıboldyń damýyna eleýli úles qosqan úshin basshylyq oǵan Almatydan páter beredi.   Qanaǵatov voleıbol komandasymen Kıev, Máskeý, Lenıngrad (qazirgi Sankt-Peterbýrg), Tashkent, Frýnze (qazirgi Bishkek), Úrimji, Baký, Belgrad, Samarkandtaǵy iri jarystarǵa qatysqan.   Voleıbol oıynshysy, keıin bapker bolǵan Nurbolat Qanaǵatov keıin osy sporttyń erejesin jetik biletin maman retinde respýblıkalyq iri jarystarda tóreshi de bolǵan. Voleıboldan ulttyq dárejedegi tóreshi.   48 jyldan astam ýaqyt Qazaqstandaǵy belgili ýnıversıtetterinde qyzmet jasaǵan Nurbolat Qanaǵatov búginde birneshe ǵylymı jumystardyń avtory. Ol 50 jýyq ǵylymı-metodıkalyq materıal, bes metodıkalyq oqý quralyn jazǵan. AQSh jáne Chehııadaǵy ǵylymı jýrnaldarda zertteý jumystary jaryq kórgen.   Nurbolat Telmuhametulynyń shákirtteriniń bir bóligi qazir ǵylym kandıdattary, keıbiri voleıboldan jattyqtyrýshy bolyp júr.   Bilim berý salasyndaǵy eńbegi eskerilip, Nurbolat Telmuhametulyna 2006 jyly  “Qazaqstan Respýblıkasy bilim berý isiniń qurmetti qyzmetkeri”, sportqa qosqan úlesi úshin “Qazaqstan Respýblıkasy Qurmetti sport qaıratkeri” ataǵy berildi.   Buǵan qosa Sátpaev atyndaǵy Qazaq ulttyq tehnıkalyq ýnıversıtetiniń sport jáne dene shynyqtyrý kafedrasy dosent dárejesin alady. Bilikti maman qazir de osy ýnıversıtette shákirt tárbıelep, sabaq beredi. Eki jyldan keıin ustazdyq qyzmetine elý jyl tolatyn Nurbolat Telmuhametuly áli de biraz ǵylymı jańalyqtar jazýdy josparlaıdy.   Nurbolat Telmuhametulynyń búgingi tańda jas urpaqty dene tárbıesine baýlýda, salaýatty ómir saltyn qalyptastyrýda ári nasıhattaýda atqaryp júrgen eńbegi zor. Ustazdyq qyzmetimen birge bapkerlik qyzmeti arqyly sheberlik shyńdaýǵa úles qosyp kele jatqan sport janashyry. Búginde Nurbolat Telmuhametulynyń tárbıelegen shákirtteri elimizdiń túpkir-túpkirinde ustazynyń ıgi isin jalǵastyryp júr. Dastan Kenjalın. Derek: Mádenıet jáne sport mınıstrligi. Foto: egemen.kz