Qoǵam • 26 Jeltoqsan, 2022

Sottar da sybaılas jemqorlyqqa urynǵan ba?

Qarasha aıynda «Egemen Qazaqstan» gazetine «Solqyldaq sot ádiletti Qazaqstanǵa qalaı qyzmet etedi» degen bir bettik kólemdi maqalamyz shyqty. Qysqasha ǵana mazmunyn eske túsirer bolsaq, maqalada Muqash Qabdirov degen azamattyń saıası qýǵyn-súrginniń zardap shegýshisi bolyp sot arqyly tanylǵany, oblystyq prokýratýra ony aqtaǵany aıtylǵan. Endi qýǵyn-súrginniń zardap shegýshisi retinde onyń turǵyn úı talap etkeni (óıtkeni turǵyn-úı jaǵdaıyn jaqsartýdy surap 2010 jyldan beri kezekte tur), biraq Petropavl qalalyq turǵyn-úı kommýnaldyq sharýashylyǵynyń komıssııasy sol úıdi bergende onyń otbasy músheleriniń sany 5 adam ekenin, óziniń úshinshi top múgedegi ekendigin eskermeı tórtinshi qabattan bir-aq bólmeli úıdi jekeshelendirý quqyǵynsyz bergeni, al Qabdirov jedelsatysy joq úı bolǵan soń múgedektigine baılanysty tómengi qabattan úsh bólmeli úıdi zańǵa sáıkes jekeshelendirý quqymen berýdi eki jyldan beri talap etip, sottasyp júrgeni týraly jazylǵan. Sýdıalardyń aldymen bir sheshim shyǵaryp, biraq oryndaýshylyq qaǵaz bermeı artynan ózderiniń sheshiminen taıqyp, basqa sheshim qabyldap, adamdy ábden áýre-sarsańǵa salǵandyǵy, sol sebepti quqyǵyn taptap júrgeni aıtylǵan. Osy oqıǵaǵa qaıta oralýǵa týra kelip otyr.