Oral qalasynda Qazaqstannyń Halyq artısi, Memlekettik syılyqtyń laýreaty, ánshi-kompozıtor Eskendir Hasanǵalıevtiń ánderin oryndaýshylardyń H halyqaralyq «Atameken» án festıvali ótti.
Batys Qazaqstan oblysy ákiminiń qoldaýymen ótetin «Atameken» án festıvali eń alǵash 2000 jyly uıymdastyrylǵan bolatyn. Buǵan deıin eki jylda bir márte ótkizilip kelgen óner baıqaýy endi jyl saıyn ótetin boldy. Bul sheshimdi óńir basshysy Altaı Kólginov baıqaýdyń saltanatty ashylýynda jarııa etti.
Festıvalge Qazaqstannyń túkpir-túkpirinen jáne Reseıden 30-ǵa jýyq jas ánshi qatysty. Reseı Federasııasynyń Astrahan oblysy Volodar aýdanyndaǵy Altynjar aýylynan kelgen Dıana Jıenálıeva Qurmanǵazy Saǵyrbaev atyndaǵy aımaqtyq mádenı ortalyqta qyzmet etedi eken. Eskendir Hasanǵalıevtiń «Kelshi, kelshi, balashym!» ánin bala kúninen súıip aıtady eken. Jas ánshi bolashaqta tarıhı otanynda ótetin óner baıqaýlaryna turaqty qatysyp turý úshin qazaqstandyq áriptesterimen tyǵyz qarym-qatynas ornatqanyna qýanyshty.
Quramynda Eskendir Hasanǵalıev, Qazaqstan Respýblıkasynyń eńbek sińirgen qaıratkeri, Chaıkovskıı atyndaǵy Almaty mýzykalyq kolledjiniń dırektory Birjan Hasanǵalıev, «Eren eńbegi úshin» medaliniń ıegeri, ánshi Marat Sarbópeev pen Jaskeleń ǵaısaǵalıev, I halyqaralyq «Atameken» festıvaliniń birinshi oryn mıegeri, belgili ánshi Tańat Jeksenbaevtar bolǵan qazylar alqasy bıylǵy mereıtoılyq baıqaýdyń bas júldesine Almaty qalasynan kelgen Bekzat Abıtov laıyq dep sheshti. Oǵan 750 myń teńge kóleminde aqshalaı júlde buıyrdy. I orynǵa Túrkistan oblysynan kelgen «Saryn» toby shyqty. II oryndy oraldyq Damır Satybaev pen atyraýlyq Muratbek Jumashev bólisti. Atyraýlyq Erjan Myrzahmetov, tarazdyq Farıza Dosbolova, shyǵysqazaqstandyq Nurbol Cherýbaev júldeli III oryn ıegeri atandy.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Rafhat HALELOV