Mamandardyń daıyndyǵy pysyqtaldy

Osy jyly elimizdiń kóptegen óńi­rin­de qar qalyń jaýǵany belgili. Árıne, qandaı da bir apattyń beti aýlaq bolsyn deımiz. Áıtkenmen, saqtanǵannyń san soǵyp qalmaıtyny da aqıqat. Qa­har­­ly qystyń qos búıirden qysqany eske­rilgen bolýy kerek, tótenshe jaǵ­daı­lar qyzmetine jaýapty mamandar sý tasqyny oryn alǵan jaǵdaıda qandaı qadamdarǵa barý kerektigine aıtarlyqtaı bas aýyrtypty. Oǵan biz kezekti oqý-jattyǵý jıynynda da kóz jetkizdik.

Baızaq aýdanynda ótken is-shara barysynda salaǵa jaýapty mamandar avarııalyq-qutqarý qyzmetine tıesi­li quraldardyń áleýetimen tanystyryp, qaýip tóngen jaǵdaıda jergilikti tur­ǵyndardy evakýasııalaý, tórt túlik maldy qaýipsiz jerge jetkizý jumys­ta­ryn pysyqtady. Oblys ákiminiń qada­ǵa­laýymen ótken oqý-jattyǵý jıyny kezinde azamattyq qorǵaý qyzmetiniń tótenshe jaǵdaıǵa daıyndyq deńgeıi zerdelendi. Mamandardyń jedel áreket­te­rine zer salsaq, olar kez kelgen jaǵ­daı­ǵa daıyn ekenin baıqaısyń.

Oqý-jattyǵý jıyny arnaıy túzilgen ssenarıı boıynsha júrgizildi. Qaıbir jyly Talas ózeni arnasynan tasyp, mańaıdaǵy turǵyn úılerdi sý basý qaýpi tóngen bolatyn. Turǵyndardyń «tabıǵat tosyn minez tanyta ma?» dep ábirjigenin de kórgen edik. Qutqarýshylar sol oqı­ǵany qaperde ustady ma, kim bil­sin? Áıteýir oqıǵa órbıtin nysan retin­de bastaýyn Qyrǵyz elinen alatyn Talas ózenin tańdapty. Munda jos­parǵa sáıkes, sý tasqyny qaýipi tóngen aýmaqtaǵy balyq aýlaýǵa kelgen azamat­tardy qutqarý ju­mys­tary júr­­­giziledi. Jedel qutqarý ja­sa­ǵy­nyń qyz­met­ker­leri qyzmettik ıttiń qaty­sýy­men tur­ǵyn­dardy taýyp, olardy arnaı TREKOL tehnıkasymen evakýasııalaıdy.

Ssenarııge sáıkes qutqarý jumysy­na qatysýshylar sý jaıylǵan aýmaqty tazartýǵa jedel kirisedi. Olardyń óz ju­mysyn jankeshtilikpen atqaryp jatqanyna qarap, munyń jaı ǵana oqý-jattyǵý ekenin esten shyǵaryp alasyń. Tez qı­myldaý arqyly jaýaptylar ózde­­ri­ne tıesili jumysty oıdaǵydaı oryn­daıdy. Elektr jelileri men gaz shar­ýa­shylyǵyna jaýapty mamandar da júktelgen mindetterin talapqa saı atqarady. Jalpy alǵanda, Baızaqtaǵy oqý-jattyǵý jıynyna 101 adam, 25 birlik tehnıka jumyldyrylǵanyn aıta ketken jón. Oqý-jattyǵý jıynyna qa­ty­sýshylardyń shalt qımylyna qarap-aq olardyń kez kelgen jaǵdaıǵa daıyn ekenin ańǵarý qıyn emes.

Sondaı-aq oqý-jattyǵý jıyny Kúıik asýynda da uıymdastyryldy. Kúıikte qys mezgilinde túrli oqıǵalar bolyp jatady. Sodan da bolsa kerek, uıymdastyrýshylar Kúıik asýynda da sheberlikterin bir pysyqtap alýdy jón kórgen sekildi. Munda mamandar qar qursaýynda qalǵan azamattardy qutqarý boıynsha daıyndyq ju­mysyn pysyqtady. Is-shara barysyn­da óńir basshysy E.Qarashókeev ob­lystyq jáne aýdandyq azamattyq qor­ǵaý qyz­met­teriniń daıyndyǵyn zer­delep, ma­terıaldyq-tehnıkalyq baza­nyń áleýe­ti­men tanysty.

«Tótenshe jaǵ­daı­lar­ǵa jaýapty ma­man­­dardyń jumysy aýyr ekeni anyq. Kisi balasy qaı jerde qandaı oqıǵa bolatynyn tap basyp aıta almaıdy. Qorshaǵan orta men adamdarǵa qaýip tóngen kezde ma­mandardyń kómegine júginemiz. Tur­ǵyn­darǵa túrli deńgeıde qaýip tónýi múm­kin. Ondaı jaǵdaıda mamandardyń biliktiligi men daıyndyǵy, batyldyǵy, bilimi synǵa túsedi. Olar qaı kezde de tas túıin daıyn bolýy kerek.

Biz salaǵa jaýapty azamattardyń eń­be­gin baǵalaımyz. Maman retinde olar qaı kezde de aıanyp qalmaıtyny belgili. Qandaı qıyn jaǵdaı bolsa da, tyǵyryqtan jol tabatyn, tóngen qaýipke toıtarys beretin mamandardyń biliktiligin arttyrý jumystary turaqty túrde júrgizilýge tıis. Bul – qoǵam qaýip­siz­diginiń kepili», deıdi óńir basshysy Erbol Qarashókeev.

Aýdandarda ótken oqý-jattyǵý jıy­ny barysynda tótenshe jaǵdaıǵa jaýapty mamandar kez kelgen jaǵdaıǵa saqadaı saı ekeni baıqaldy. Ju­mys­qa degen jaýapkershiliktiń júgin sezinetin azamattardyń sheberligi kóz súısintti.

Jambyl oblysy