Munaıly óńirdiń Reseı Federasııasymen shekaradaǵy Qurmanǵazy aýdanynda Erseıit Bralın degen alyp kúsh ıesi turady. Ol sársenbi kúni temirjol relsimen jeti vagondy 9,75 metrge súırep, el rekordyn jańartty.
Oblystyq tótenshe jaǵdaılar departamenti baspasóz qyzmetiniń málimetine súıensek, órt sóndirýshi bıyl 36 jasqa tolypty. Shekara qyzmetinde áskerı boryshyn ótegen soń, 2013 jyly Qurmanǵazy aýdanyndaǵy №7 órt sóndirý bólimine jumysqa ornalasqan. Qazir bólimshe komandıri bolyp jumys isteıdi.
Erseıit Bralınniń aıtýyna qaraǵanda, bala kezinen qazaq kúresine ańsary aýǵan. Gir tasyn da kóteredi. Keıingi úsh jyldan beri bilek kúshin tolyqtyratyn ózge de sport túrinen jetistikke jetip júr. Máselen, 2023 jyly paýerlıftıngten Azııa chempıonatynyń qola júldesine ıe boldy. Bir jyldan soń Qyrǵyz Respýblıkasynda jalaýy jelbiregen álem chempıonatynda 100 kg salmaqta top jaryp, chempıon atandy. Byltyr О́zbekstanda kúshtik sport túrlerinen ótken álem chempıonatynda qola júldeni ıelendi. Sol jyly paýerlıftıngten Azııa chempıonatynyń altynyn enshiledi. Al bıyl atalǵan sporttan Qazaqstan chempıony boldy.
«Sport – myqty densaýlyqtyń kepili. Sol sebepten sporttan qol úzbeı kelemin. Udaıy bilek kúshimdi tolyqtyratyn jattyǵýlar jasaımyn. Temirjol vagondarynyń salmaǵy aýyr ǵoı. Ony súıreý úshin tabandylyq, shydamdylyq qajet. Eki jyl buryn 94 tonna tartatyn vagondy súıregen edim. Endi bıyl jeti temirjol vagonyn 9,75 metrge deıin súıredim. Jeti vagonnyń salmaǵy – 165,2 tonna», deıdi E.Bralın.
Alyp kúsh ıesiniń el rekordyn jańartqan qadamy eleýsiz qalǵan joq. Jeti vagondy súıregen Erseıit Bralınniń bul jetistigi Qazaqstannyń «KInES–2026» rekordtar kitabyna tirkeldi. Bul derekti elimizdegi rekordtar kitabyna tirkeý júrgizetin ókil Baqytjan Tastúlekov rastap, órt sóndirýshige arnaıy kýálikti tapsyrdy.
Atyraý oblysy