Izraıldik kapral Gılad Shalıt 5 jylǵa sozylǵan tutqyndaýdan keıin Izraılge oralatyn boldy. Sóıtip, Palestına tarapy Shalıtti araaǵaıyndyqqa júrgen Egıpetke ótkizip berdi. Esesine Izraıl jaǵy bir kapral úshin 1027 palestınalyq tutqyndy qaıtarýy tıis.
Keshe 27 áıel tutqyndy qosa alǵanda, 477 adam Palestınaǵa qaıtaryldy. Qalǵan 550 tutqyn eline aldaǵy aıda oralatyn bolady. Al tankıst Gılad Shalıt 2006 jyldyń 25 maýsymynda tutqynǵa túsken edi. Izraıl jaǵy bosaǵan palestınalyqtardan qaýiptenetindikterin de ashyq málimdep otyr.
Elshige qastandyq jaıy tekserilmeıdi
Iran bıligine Saýdııa elshisin óltirmek boldy dep taǵylǵan aıyp AQSh tarapynan Iran men Saýd Arabııasynyń arasyna ot tastamaq nıetpen qoldan uıymdastyrylǵan, dep málimdedi Iran prezıdenti Mahmud Ahmadınejad. Onyń aıtýynsha, AQSh ilgeriletken aıyptaýlar kúlki týdyrady.
Osynyń aldynda Iran syrtqy ister mınıstri Alı Akbar Salıhı óz eliniń atalǵan aıyptaýǵa baılanysty tekserý júrgizýge daıyn ekenin málimdegen edi. Endi Iran basshylyǵy aıyptaýǵa eshqandaı negiz joq ekenin kóldeneń tartyp, AQSh-taǵy Saýdııa elshisin óltirýge áreket jasalýyna baılanysty tekserý júrgizilmeıtinin málimdedi.
Rım papasyn ultshyl dep atady
Aktrısa Sıýzan Sarandon Nıý-Iorkte ótken kıno-festıval sheńberindegi bir shara aıasynda sóılegen sózinde Rım Papasy Benedıkt XVI-ny ultshyl dep atady. S.Sarandon «О́lik kele jatyr» fılmindegi róli úshin «Oskar» alǵan bolatyn.
S.Sarandonnyń áriptesi B.Balaban aktrısadan suhbat alý barysynda onyń artyqtaý ketkenin meńzegenimen, S.Sarandon Benedıkt XVI-nyń ultshyl ekenin taǵy da qaıtalaǵan. Benedıkt XVI – Iozef Ratsınger jasóspirim kezinde shyn máninde jastardyń «Gıtlerıýgend» ultshyl tobynyń sapynda bolypty. Onyń túsindirýinshe, gıtlerlik Germanııada kóptegen jasóspirimder osy uıym qataryna ótýge májbúrlengen.
Iаnýkovıchti Brıýsselge jibermedi
Eýroodaq Ýkraına prezıdenti Vıktor Iаnýkovıchtiń Brıýsselge saparyn boldyrmaı tastady. Muny dıplomatııalyq korpýstaǵy derek kózi málimdedi. Onyń sózine qaraǵanda, sapar ekijaqty únqatysý utymdy bolatyn sátke deıin keıinge shegerilip otyr.
V.Iаnýkovıch Brıýsselde Eýroodaq prezıdenti Herman van Rompeımen jáne Eýrokomıssııa basshysy Hose Manýel Barrozýmen kezdesýi kerek bolatyn. EO ókilderi sapar kezinde Ýkraınanyń eks-premeri Iý.Tımoshenkony bosatý týraly áńgime qozǵalady dep úmittengen edi. Biraq Ýkraına prezıdenti sapar aldynda eshkimniń eliniń ishki isine aralasýǵa quqy joq ekenin jarııalaǵan bolatyn.
Amerıkany jańa soǵysqa tartty deıdi
Senator Djon Makkeın AQSh prezıdenti Barak Obamanyń Ýgandaǵa 100 áskerı qyzmetshi jiberý týraly sheshimi eldi jańa soǵysqa tartýy yqtımal degen qaýpin bildirdi. Ol 100 myńdaı amerıkalyq áskerı qyzmetshi Aýǵanstanda turǵanyn, al Iraktan ásker shyǵarý áli tolyq aıaqtalmaǵanyn atap kórsetti.
Senatordyń sózine qaraǵanda, Qurama Shtattar qaıtyp shyǵa almaıtyn jaǵdaıǵa tap bolýy múmkin. 2008 jylǵy prezıdenttik saılaýda B.Obamanyń baqtalasy bolǵan Dj.Makkeın áskerdi Kongrestiń maquldaýynsyz jiberý týraly sheshimniń aıaǵy jaqsylyqqa aparmaıtynyn qaperge saldy. «Men Somalı men Lıvandy umytqan joqpyn. Eki jaǵdaıda da AQSh óz áskerin atalǵan elderden ıt qýǵandaı etip shyǵarǵan bolatyn», deıdi senator.
Parlamenttik minberge tosqaýyl qoıdy
Ýkraına Joǵarǵy Radasyndaǵy «BIýT-Batkıvshına» fraksııasynyń ókilderi birshama ýaqyt parlamenttik minberge eshkimdi jibermeı turyp alǵan. Olar osylaısha áriptesteri Iýlııa Tımoshenkonyń sottalǵanyna ózderiniń narazylyqtaryn bildirgen.
Radada sóz sóılegen BIýT fraksııasy basshysynyń orynbasary Andreı Kojemıakın parlament óziniń zańdylyǵyn joǵaltqanyn, onyń qyzmetin toqtatýy tıistigin málimdegen. Mundaı Rada Ýkraınaǵa kerek emes, deıdi ol. Parlament spıkeri Vladımır Lıtvın mundaı qoqan-loqqyǵa eshqandaı negiz joq ekenin kóldeneń tartty. Onyń pikirinshe, parlamentti taratýǵa oppozısııa jetkilikti qoldaý kórmeıdi.
Qysqa qaıyryp aıtqanda:
*Qara násildi respýblıkashyl Herman Keın eger AQSh-taǵy prezıdenttik saılaý qazir ótse, Barak Obamany shań qaptyryp keter edi. Bul – Rasmussen Reports kompanııasy saıtynda jarııalanǵan suraý salýlardyń nátıjesi. *Izraıldik radıkaldar keshegi kapral Gılad Shalıtke aıyrbastalǵan palestınalyq tutqyndar mingen avtobýsty toqtatýǵa áreket jasady. Jalpy, Izraılde atalǵan aıyrbasqa qarsylar kóptep sanalady. *Nıý-Iork shtatynyń kóptegen turǵyndary jylyna 1 mıllıon dollardan artyq aqsha tabatyn amerıkalyqtarǵa salyqty kóbeıtý týraly usynysty qoldaıtyndyqtaryn málimdegen. Qoldaǵandardy paıyzǵa shaqqanda – 72, qarsylar – 26. *Gallup zertteý kompanııasy Qurama Shtattarda marıhýanany memlekettik deńgeıde zańdastyrýdy qoldaıtyndar sany 50 paıyzdy quraıtynyn málimdep otyr. 1969 jyly ondaılar qatary tek 12 paıyzdy ǵana quraǵan eken.Internet materıaldary negizinde ázirlendi.
