Alash urany

Búgingi jurt samarqaý. Za­man­­dastarymyz beıqam, enjar. Naryq, naryq dep paryqtan ketip baramyz. Osylaı  aıtatyndar az emes. Osylaı aıtatyndardyń birazy aldyńǵy kúni Astanadaǵy Kon­gress-Holl saraıynda ótken Bekbolat Tileýhannyń «Alash urany» atty shyǵarmashylyq keshine qatysqan bolsa, raıynan qaıtqan shyǵar dep oılaımyz. Ol kesh Bekbolattyń búgingi bir bıigin kórsetip qana qoıǵan joq, ol kesh qazirgi qazaq rýhynyń deńgeı-dárejesin de birshama  tanytyp berdi. Bekbolat Tileýhannyń ánshi­li­gi, kompozıtorlyǵy, qoǵamdyq belsendiligi jaıynda aıtyp jatý kózi qaraqty oqyrman úshin artyq ta bolar. Alaıda, keshtiń talaı tusynda óreli óner ıesi­niń asqaq únimen de, júreginiń tereń túkpirlerinen shymyrlap shyqqan, shyrqyrap aıtqan óz shyndyǵymen de tyńdaýshy­lar­dyń jan dúnıesin silkip-silkip jibergenin, búkil zaldy qanat­tan­dyryp áketkenin taǵy da ra­zy­lyqpen atap ótýdiń jóni bar. Ras, keıingi kezde san túrli sebepterge baılanysty BAQ betinde, Internet saıttarynda birese maqtalyp, birese dattalyp jatqan Bekbolatqa qoǵamdyq ómirdiń ár qyryna qatysty kóp­te­gen suraqtardyń qoıylýy kesh­ti ózindik tól  sıpatynan alys­tatyp áketken tustar da boldy, Bekbolattyń óziniń shy­ǵar­mashy­lyq keshti saıasılandyrýǵa, sah­na­ny kóptiń kókeıinde júrgen biraz saýaldarǵa jaýap qaıtarýǵa paıdalanyp qalýdan ket ári emestigi de keı-keıde kórinip turdy.  Alaıda, durys aıtsa da, burys aıtsa da sózine qalyń halyq qulaq túrmeı qoımaıtyn azamattyń júrekjardy únin keı­de elite, keıde elige, keıde je­li­ge tyńdaǵan jastardyń qo­ǵam­dy tolǵandyrar taqyryp­tarǵa nazary sol keshte arta túskeni anyq. Bir jaqsysy, Bekbolat Ti­leý­han sol keshte bárin ózi biletindeı, shyndyqty jalǵyz ózi tiletindeı bolyp sóılegen joq. О́ner adamy, emosııa ıesi retinde artyq aıtyp, kem túsip ja­ta­tyn jaılary bar ekenin de ja­syr­mady. Sondyqtan da onyń sózi zaldy kernep ketken jurt­shylyqtyń (úsh saǵatqa sozyl­ǵan keshti tikesinen tik turyp tyńda­ǵan adamdardy aıtpaǵan­da, zalǵa kire almaı syrtta qal­ǵan­dar qanshama deseńizshi!) jú­regine jetip, kóńilinen oryn taýyp jatty. Munyń ózi el adamyna aınalǵan tulǵalardyń halyq aldyndaǵy árbir sózine aıryqsha jaýapkershilikpen qaraýy shart ekenin taǵy da dáleldeı túsedi. Eń bastysy, Bekbolat babyn­da ekenin kórsetti. Parlament Májilisiniń depýtaty retinde  kóp jumys atqara júrip, ánshi­lik deńgeıin tómendetpegenin tanyt­ty. Shyn máninde,  Bekbolat úni Alash uranyna aınaldy.  Kesh ıesiniń  ózi «Patshamyzdyń jan-júregin jaryp shyqqan sóz ǵoı» dep bastap, «Elim meniń» ániniń asqaq áýenimen aıaqtalǵan sol kesh halqymyzdyń boıyn­daǵy eldik minezdiń Táýelsiz­diktiń jıyrma jyldyǵy qarsańynda kemeline kele túskenin kórsetip berdi. «Egemen-aqparat».