Tatýlyq pen kelisim ordasy

Almaty oblysy Eńbekshiqazaq aýdanynyń ortalyǵy Shelek aýylynda bes júz oryndyq jańa meshit boı kóterdi. О́te qysqa merzimde turǵyzylǵan bul meshit tek qulshylyq orny ǵana emes, aýyl halqynyń basyn biriktiretin tatýlyq uıasyna da aınalǵandaı. Otyz myńnan asa turǵyny bar Shelek aýy­lynyń burynǵy meshiti erterekte salyn­ǵandyqtan, onda kóp adamnyń namaz oqýyna múmkinshilik bolmaı kelgen edi. Aýyl halqy kópten beri jańa meshit salýdy nıet etip, qarjy máselesin sheshý úshin talaı bastama kótergen. Úsh jyldan beri sheshimi tabylmaı kelgen másele, Alla qoldap, bıyl júzege asyp otyr. Jergilikti ákimdik pen aýyl turǵyndary kásipker D.Kýzıevten meshit soǵýǵa járdem berýdi kópten beri surap júrgen. Kóktem aılarynyń birinde Shelek aýylynyń aqsa­qal­darymen bolǵan basqosýda belgili kásip­ker Dilmurat Kýzıev aýyl meshitiniń qury­ly­syn qarjylandyrýdy moınyna alyp, meshit­tiń jobasy men orynyn halyqtyń ózi tańdasa degen ótinish bildirgen. Kóp uzamaı, osy Shelek aýylynyń turǵyny Belal Ýshýrov deıtin jas kásipker aýylǵa kire beristegi ózine tıesili jer telimin meshit soǵatyn oryn retinde tegin berip, sonymen qatar qurylys jumy­syn jartylaı qarjylandyrýǵa nıet bildirdi. Aýdannyń belgili azamaty, qaıyrymdylyq sharalardyń únemi bel ortasynda júretin Bolat Nurǵazıev bolsa bul ıgi isti qarjy­landyryp qana qoımaı, meshittiń jobasyn jasaý, sáýlettendirý jáne basqa da mańyzdy sharýalaryn óz moınyna aldy. Uıymdas­tyrý­shylar meshit qurylysyn júrgizýmen qatar, aýyl turǵyndaryn osy sharaǵa jumyl­dyrýdy, eldiń ishki tatýlyǵy men kelisimin nyǵaıtýdy kózdep, Shelek qoǵamdyq birlestigin qurdy. Birlestiktiń tóraıymy etip T.Kenjeeva atyndaǵy orta mekteptiń dırektory Ardaq Qyryqbaı taǵaıyndaldy. Meshit qurylysyna aýyl turǵyndary jaz boıy jumyla kiristi. Túrli ult ókilderi ǵana emes, ózge din ókilderi de Allanyń úıin salýǵa atsalysty. Qurylys jumysynan ózge, jumyskerlerge tamaq ázirleý, gúl otyrǵyzý, aýlany abattandyrý sekildi sharýany jergilikti halyqtyń ózi atqardy. Onyń syrtynda Shelek birlestiginiń esep-shotyna qarjylaı kómegin aýdarǵan turǵyndar da jeterlik. – Meshit rýhanııattyń, mádenıettiń, sondaı-aq beıbitshiliktiń ordasy. Barsha ult ókilderin ǵana emes, kúlli adamzattyń basyn Jaratýshynyń aldynda biriktiretin qasıetti oryn. Meshitti tek ǵıbadat úshin soqpaıdy, urpaq bolashaǵy hám adamzat tynyshtyǵy úshin, búgingi býyn men keleshektiń tatýlyǵy men yntymaǵyn nyǵaıtý úshin turǵyzady. Bul qasıetti úıdi de biz qurylysyn bastaǵan kezde sondaı nıetpen qolǵa aldyq, – dedi jýrnalısterdiń suraqtaryna jaýap bergen kásipker D.Kýzıev. Shelek aýylyndaǵy eńseli jańa meshittiń ashylý saltanatyna KMDB tóraǵasynyń birinshi orynbasary Muhammed Hýseın Alsabekov bastaǵan din jáne zııaly qaýym ókilderi qatysyp, aýyl turǵyndaryna degen jyly lebizderin bildirdi. Qanat ESKENDIR. Almaty.