Baskilerdiń separatıstik ETA uıymy qarýly kúresti túpkilikti toqtatyndyqtary týraly jarııa etti. Onda bylaı delinedi: «ETA Ispanııa men Fransııa úkimetterine janjaldardyń saldaryn sheshýge jáne qarýly qarsy turýlardyń aıaqtalýyna baǵyttalǵan tikeleı únqatysýlardy bastaý týraly úndeý tastaıdy».
Ispanııa premer-mınıstri Hose Lýıs Rodrıges Sapatero óziniń teleúndeýinde ETA-nyń qarýly kúresti toqtatý týraly málimdemesin demokratııanyń, zańdylyqtyń jáne parasattyń jeńisi dep atady. ETA uıymynyń táýelsiz bask memleketin qurý maqsatynda 1959 jyly negizi qalanǵan bolatyn.
Jańa jospardy maquldady
Grekııa parlamenti bıýdjet shyǵystaryn odan ári qysqartýdy qarastyratyn jańa daǵdarysqa qarsy jospardy maquldady. Ol boıynsha zeınetaqy qysqaryp, jyljymaıtyn múlikke qosymsha salyq salynatyn bolady. Oǵan qosa, 10 myń memlekettik qyzmetshi tolyq emes eńbekaqy alýǵa kóshiriledi.
Mundaı jospardy qabyldaý Grekııaǵa Halyqaralyq valıýta qorynan, Eýropa ortalyq bankinen jáne Eýroodaqtan 8 mıllıard dollar qarjylaı kómek bóliný úshin qajetti shart bolyp tabylady. Daǵdarysqa qarsy josparǵa daýys berý qarsańynda Grekııada eki kúndik jappaı ereýil bolyp ótti. Polısııamen qaqtyǵystar saldarynan kem degende 16 adam jaraqat aldy. Bir adam júrek talmasynan kóz jumdy.
Medvedevtiń tabysy jarııa etildi
Reseıdiń Ortalyq saılaý komıssııasy «Birtutas Reseı» partııasynan Memlekettik dýmaǵa kandıdattardyń tabystary týraly málimetterdi jarııalady. Olardyń ishinde «BR-diń» tizimin bastap turǵan el prezıdenti Dmıtrıı Medvedev te bar.
Jarııalanǵan derekterge súıensek, bir jylda Medvedev 3,37 mıllıon rýbl taýypty. Eki rarıtetti GAZ avtokólikteri men Máskeýde páteri jáne eki garajy bar eken. Sondaı-aq, onyń atyna birqatar bankterden esep ashylsa, olarda 4,2 mıllıon rýbl bar kórinedi. Kólikterine kelsek, bireýi 1962 jylǵy GAZ-21 bolsa, ekinshisi 1948 jylǵy GAZ-20.
Stýdenttermen kezdesýin boldyrmady
«Ádiletti Reseı» partııasynyń serkesi Sergeı Mıronov zańger mamandyqtaryna oqytatyn joo-lar stýdentterimen kezdespek edi. Birinshi kezdesýi Reseı memlekettik ınnovasııalyq tehnologııalar jáne kásipkerlik ýnıversıtetinde ótýi tıis bolatyn.
Mıronovtyń aıtýynsha, bireýler arqyly oǵan joǵarydan telefon shalynyp, joo basshylyǵyna mundaı kezdesýdi ótkizbeý týraly usynys túskeni jetkizilgen. Al onyń aldynda kezdesý ótkizýge «tehnıkalyq aqaýlar» kedergi keltirip otyrǵany kóldeneń tartylypty. «ÁR-den» qorqatyndary sonshalyq, bizge federaldy BAQ-tarǵa, onyń ishinde telekanaldarǵa shyǵýǵa jol jabyq, endi adamdarmen kezdesýge múmkindik berilmeýde», deıdi S.Mıronov.
Ázerbaıjan Irannan nota aldy
Jaqynda Ázerbaıjan shekarashylary óltirgen adam adasyp ketken ırandyq shekarashy bolyp shyqty. Osyǵan baılanysty Baký Tehrannan narazylyq notasyn aldy. Iran shekara qyzmetiniń ókili, polkovnık Moıtab Mýsavıdiń aıtýynsha, onyń áriptesi patrýl barysynda qatelesip ketip, Ázerbaıjan shekarasyna aıaq basqan.
Mýsavıdiń sózine qaraǵanda, Ázerbaıjan shekarashylary zańsyz ári jaýyzdyq áreketke barǵan. Munyń aldynda Ázerbaıjannyń memlekettik shekara qyzmeti shekara buzýshy ázerbaıjan shekarashylaryna shabýyl jasamaq boldy, sóıtip, olardy qarý qoldanýǵa májbúrledi, degen edi. Qaza tapqan 20 jasar shekarashy Akber Gasanpýr eken.
Qysqa qaıyryp aıtqanda:
*Grekııanyń memlekettik qaryzy 350 mıllıard eýroǵa jaqyndap keledi. El defolt sheginde tur. HVQ Grekııaǵa 110 mıllıard eýro bólse, bul qarjy eldi daǵdarystan shyǵarýǵa jetkiliksiz bolyp shyqty. Sóıtip, Afına taǵy da qarjylaı kómek suraýǵa májbúr bolyp otyr. *Ýkraınanyń «Iýjnoe» konstrýktorlyq bıýrosy kópfýnksııaly «Sapsan» zymyrandyq keshen qurý jumystaryn 2015 jyldyń aıaǵyna deıin aıaqtaýdy josparlap otyr. Keshen qurýǵa shamamen 439,3 mıllıon dollar jumsalmaq kórinedi. *Perýde feıerverkterge qatysty eki oqıǵa saldarynan kem degende 18 adam qaza tapty. Balalardy qosa alǵanda 14 adam pırotehnıkalar tıelgen avtobýs jarylǵan kezde kóz jumǵan. Ekinshisinde jasyryn zaýyttan polısııa tárkilegen pırotehnıkalar jarylǵan. Onda tórt polısııa qyzmetkeri opat bolǵan. *Ýkraına basshylyǵyna Lvov qalalyq keńesiniń depýtaty Rýslan Koshýlınskıı usynyspen shyqty. Onda ol jergilikti turǵyndar Lvov áýejaıyna Ýkraına ultshyldary uıymynyń (ÝUU) kóshbasshysy bolǵan Stepan Banderanyń atyn berý týraly ótinish bildirip otyrǵanyn málimdegen. AQSh-tyń Alabama shtatyndaǵy Atmor qalasyndaǵy túrmede 2005 jyly alty aılyq ulyn jaýyzdyqpen óltirgen 38 jastaǵy Krıstofer Tomas Djonson jazalandy. Onyń denesine máńgilikke uıyqtatatyn dári jiberildi.Internet materıaldary negizinde ázirlendi.
