Alǵys azaımaǵaı. Alaıda...

Aınalaıyn alashyńyzda: «Altyn alma, alǵys al», degen sóz bar. «Jaýynmen jer kógerer, alǵyspen er kógerer», degendi qaǵıdalaǵan da qazaǵyńyz. Bul ónegeler, bul ólshemder búginińizge júre me, júrmeı me, ulaǵat bop uǵynyla ma, uǵynylmaı ma, ol — basqa gáp. Bizdiń bir aýyz sózimiz «Alǵys hat» deıtuǵyn dúnıe haqynda ǵana. Jaqynda bir ozat oqý ornynyń mereı­toıynda boldyq. Bári jaqsy, bári keremet. О́kinishke qaraı, óte-móte ersi kóringen bir máselege nazar jyqpasqa lajymyz joq. Bir kezeńderde jeke adamdar bolsyn, ujym-uıymdar bolsyn, olardyń mereı­toılary men músheltoı­larynda «Quttyq­taý adresteri» kópirte qurastyrylyp, kóptep tapsyrylyp, mezi etýshi edi. Olarda ne jazylatyny, qalaı qıystyrylatyny, qaıdan kóshiriletini barshaǵa aıan-dúr. Endi ondaı adrester aıdalada qalyp, «Alǵys hattar» nópiri kópir buza tasqyndap, ystyq yqylas týdyrýdyń ornyna yǵyr shyǵaryp barady. Álgi ozyq oqý ornyna «Alǵys hattardyń» shekten tys kóp tapsyryl­ǵany sonshalyq, olardy qaıda qoıar eken degen ýaıym týdy. Ustazdar men shákirt­ter álgi «Alǵys hattardy» qabyldap, áınekterin syndyrmaı, jıektemelerin búldirmeı tasýdan tıtyqtady-aý. Alýan túrli meke­me­ler­diń, kásiporyndardyń, ashyq jáne jabyq AQ pen JShS, oblys­tyq, qalalyq, aýdan­dyq ákimdikterdiń, basqarmalar men bólim­derdiń, taǵysyn-taǵylardyń bastyq­tary, tóraǵalary, pre­zıdentteri, tóraıym­dary, úlkendi-kishili depýtattaryńyz, partııalar men ózge de qoǵamdyq uıymdardyń jetekshileri shıyryp qoldaryn qoıǵan, jıektemeler men áınekterge salynǵan «Alǵys hattar» aǵyny qyrǵyn-aq. Qazir, basqa jaqty qaıdam, bizdiń Ońtústik Qazaq­stan oblysynda osyndaı aǵym asqynyp tur. Bir qyzyǵy, baıqap qarasańyz she, jańaǵy «Alǵys hattardy» tapsyrýshy túrli-túrli bastyqtaryńyz mereıtoı ıelerine emes, ózderiniń shıyryp qoıǵan qoldary men aty-jónderine hám mór­lerine mereılene qarap, lázzattanatyn sekildi seziledi. Talaı-talaı tulǵalar­dyń: «Osy «Alǵys hattar» bir bólme­mizge toldy, ne isterimizdi bilmeımiz», degenderin de estıtinge aınaldyq. Oılanaıyqshy, aǵaıyn. Álbette, El­ba­symyzdyń «Alǵys hattary» aıryqsha. Jóni bólek, josyǵy erek. Jaraıdy, oblystardyń, qalalar men aýdandardyń ákimderi de birshama baıqap, baıyptap, «Alǵys hattar» tapsyrsyn. Al basqar­malar men bólimderden tómen qaraı, basqa da mekemeler, uıymdar, depýtattar, qoǵamdar, abaılasa qaıtedi?! Alǵys azaımaǵaı, aǵaıyn! Alaıda, «Alǵys hattardyń» abyroıyn aırandaı tóge bermeıik. Dana Abaı aıtqandaı-aq, ár nárseniń ólshemi men mólsheri bolady. Odan assa, «birdeńesi» shyǵady. Marhabat BAIǴUT. Shymkent.