Búgingi tabys – syndarly memlekettik saıasattyń nátıjesi

Memleket basshysy Nursultan Nazarbaevtyń Qazaqstannyń aýyl sharýashylyǵy eńbekkerlerine Úndeýi Qazaqstan Táýelsizdiginiń 20 jyldyǵy me­re­ke­siniń qurmetine qazaqstandyq dıqandar re­kordtyq astyq ónimin jınady. Otany­myz­dyń qambasyna 29 mıllıon tonnadan astam dándi daqyl, sonyń ishinde 24 mıllıon tonna altyn dán quıyldy. Astyq jınaý áli de jalǵasýda. Qazirdiń ózinde rekordtyq astyq túsimi Keńes Odaǵy kezeńindegi kórsetkishten asyp tústi. Eger sol kezderi astyqtyń túsimi gektaryna 15,4 sentnerden aınalsa, búginde bul kórsetkish gektaryna 18 sentnerden joǵary bolýda. Rekordtyq astyq ónimine elimizdiń basty as­tyq­ty óńirleriniń eńbekkerleri úlken úles qosty: Qos­tanaı oblysynda gektaryna 20,2 sentnerden 8,7 mln. tonna, Soltústik Qazaq­stan oblysynda 8,7 mln. tonna (gektaryna 22,4 s.,) jáne Aqmola obly­synda 7,1 mln. tonna (gektaryna 16,7 s.,) astyq jınaldy. Bul – Tyń ıgerý kezinen bergi astyq ónimindegi eń joǵary rekordtyq kórsetkish. Egin oraǵynyń oblystardyń óz kúshterimen júrgizilýi de erekshe mańyzdy jáıt. Astyqtyń 90 paıyzynyń sapasy 1-3 sy­nyp­ty deńgeıdegi álemdik standarttar boı­yn­sha baǵa­la­na­dy. Bul Qazaqstannyń álemdik as­tyq rynogynda básekege qabilet­tiligin saqtap qalýyna múmkindikter beredi. Búgingi tabysymyz – qazaqstandyq aýyl sha­rýashylyǵy eńbekkerleriniń jankeshti eńbegi men Táýelsizdik jyldarynda Qazaqstan ekono­mı­kasy­nyń negizgi salasy – aýyl sharýa­shylyǵyn qoldaýǵa baǵyttalǵan syndarly memlekettik saıasattyń ná­tıjesi. Rekordtyq astyq ónimin alý qazaqstandyq agrarlyq sektordyń damýynyń joǵary serpinin kórsetedi. Sońǵy 10 jylda bul saladaǵy jalpy ónim kólemi 3,5 ese, aýyl sharýashylyǵy ónim­deriniń eksporty 3 ese ósti, al un eksporty boı­yn­sha Qazaqstan búginde tórt jyl qa­tarynan álemde kóshbasshylyq oryndy ustap keledi. Men qazaqstandyq aýyl sharýashylyǵy eń­bek­ker­lerin eńbektegi jańa jeńisimen shyn júrekten quttyqtaımyn! Barshańyzǵa ıgilik jáne órkendeý tileımin! Nursultan NAZARBAEV.