Innovasııalar ilgerileýge iz ashady

Saqtaǵan Báıishev atyndaǵy Aqtóbe ýnıversıtetinde el táýel­sizdiginiń 20 jyldyǵy men osy joǵary oqý ornynyń 15 jyl­dyǵyna oraılastylyp «Innovasııalar jáne bilim berý teh­nologııalary» degen taqy­rypta halyqaralyq ǵylymı-tájirı­be­lik  konferensııa  ótkizildi. Oǵan Reseıden, Bashqurtstannan jáne elimizdiń  Atyraý, Aqtaý, Oral, Aqtóbe qalalaryndaǵy joǵary oqý oryndarynyń ǵalymdary, oqytýshy-professorlary qa­tys­ty. Irgetasy qalanǵanyna  15 jyl tolyp otyrǵan bul ýnıversıtetti táýelsizdiktiń tól perzenti deý oryndy bolmaq. Osydan týra on jyl buryn  ýnıversıtet mártebesin alǵan  munda qazir orta, joǵary jáne joǵary oqý ornynan keıingi  kásibı bilim beriledi. 2001 jyldan beri ýnıversıtetten bes myńnan astam ekomıkalyq, gýmanıtarlyq-pedagogıkalyq, tehnıkalyq mamandar, sondaı-aq, aýdarmashylar men dızaınerler túlep ushty. Profes­sorlyq-oqytýshylyq quram­nyń sapasy men sany artyp keledi.  Bilim jáne ǵylym mınıstrligi tarapynan ótkiziletin aralyq memlekettik baıqaýlardyń ná­tı­jeleri, túlekterdiń jumysqa ornalasý kórsetkishiniń joǵa­ry­lyǵy, jumys berýshilerdiń rızashylyǵy  ýnıversıtette jo­ǵary bilim berýdiń ýaqyt tala­bymen úndes júrgizilip jatqa­nynyń dáleli bolsa kerek. Ýnıversıtette  ınnovasııalyq bilim tehnologııalaryn engizýde de ilgerileý bar. 2004-2005 oqý jyly­nan bastap munda bilim berýdiń nesıelik júıesi engizildi.  Batys Qazaqstan aımaǵynyń áleýmettik jáne óndiristik salasynda ba­sym­dylyqqa ıe 21 mamandyq boıynsha joǵary kásibı bilim (bakalavrıat) berilse, magıstratýrada 8 mamandyqqa daıarlana­dy. Qazir ýnıversıtette 4278 stýdent bilim alýda, 92 bolashaq magıstr bar. Ýnıversıtet Qytaı­dyń eki irgeli joǵary oqý ornymen tyǵyz baılanys jasap keledi, nátıjesinde stýdentter almasý tájirıbesi qalyptasty. Sondaı-aq, M.V.Lomonosov atyn­daǵy Máskeý ýnıversıtetimen, Samara temir jol ınstıtýtymen, Nemis menedjment akademııasy­men, Máskeý qazirgi zamanǵy bıznes ınstıtýtymen, M.Aqmolla atyndaǵy Bashqurt memlekettik pedagogıkalyq ınstıtýtymen, Be­larýs memlekettik, Vladımır memlekettik jáne Qytaıdaǵy Shyń­jań   ýnıversıtetterimen  ara­daǵy kelisim-shartqa sáıkes ózara baılanys aıasynda oqytýshylar men stýdentter tájirıbe alma­syp, túrli taqyrypta halyqara­lyq ǵylymı-praktıkalyq konferensııalar uıymdastyrý dástúrge aınalǵan.  Joǵary oqý ornynyń materıaldyq-tehnıkalyq bazasy jaqsy, 2005 jyly jańa ǵı­maratqa kóshti. Jalpy aýmaǵy 17 myń sharshy metrden asatyn bilim berý kesheninde ýnıversıtet pen kolledjdiń oqý korpýstary, sport zal, ǵylymı kitaphana, oqý-baspa ortalyǵy, aqparattyq-teh­nologııalyq ortalyq, jataq­hana bar. Saqtaǵan Báıishev atyn­daǵy Aqtóbe ýnıversıtetiniń prezıdenti, fılosofııa ǵylym­dary­nyń doktory Bekejan Ahan ǵyl­ymı-tájirıbelik kon­feren­sııa­­ny qysqasha sóz sóılep ashyp, osy joǵary oqý ornynyń ózi táýel­sizdiktiń jemisi ekenine toqtal­dy.   Oblys ákiminiń oryn­ba­sary Sara Nurqatova jas ur­paqqa joǵary bilim berýdegi eli­mizdiń qol jetkizgen tabystaryn táýel­sizdikpen, Elbasy Nursul­tan Na­zarbaevtyń sarabdal saıa­sa­tymen sabaqtastyrdy.  Joǵary bilim eko­no­mıka damýynyń ma­ńyz­dy faktory ekenin tilge tıek ete kelip, adam kapıtaly ja­ıynda oı órbitti. Ǵalymdar ındýstrııalyq-ınnovasııalyq damý baǵyttary jáne aımaqtyq ekonomıka men basqarýdyń da­mýy, ınvestııa­lardy jáne aýmaq­tyq táýekel­derdi basqarý, joǵary mekteptegi bilim berý júıesin damytýdyń áleýmettik-pedagogı­ka­lyq jáne psıhologııalyq prob­lemalary, bilim berýdegi ınnova­sııalyq tehnologııalar, tehnıka­lyq ǵylym­dardyń qazirgi damý proble­ma­lary men keleshegi, ınnovasııa­lyq jetistikter, tildik jáne bilim berý keńistigi, tilderdi joǵa­ry mekteptegi oqytýdyń teorııa­sy men tájirıbesindegi ınnovasııalar, Batys Qazaqstan­nyń ekologııalyq jáne áleýmet­tik prob­lemalaryn sheshýdiń ınnova­sııalyq tehnologııalary, bilim berý júıesin modernızasııalaý baǵyttaryndaǵy izdenisterdi te­reńirek qaýzady,  ózekti másele­ler boıynsha oı bólisti. Satybaldy SÁÝIRBAI. Aqtóbe oblysy.