...qoldaý kórsetedi
Paryzym ári mindetim
Men balabaqsha tárbıeshisi retinde ári «Nur Otan» partııasynyń múshesi bolǵandyqtan Elbasymyzdyń saıasatynan tysqary qala almaıtynymdy aıtqym keledi. Osy oraıda, ýaqyt ótken saıyn eń aldymen bilimimdi jetildirip, is-áreketimmen jastarǵa úlgi bolýdy paryzym ári mindetim dep sanaımyn.
Elbasynyń «Bolashaqqa baǵdar: rýhanı jańǵyrý» atty maqalasyn oqyp shyǵyp, bizdiń keleshegimizdiń kemel ekendigine senimim arta tústi.
Eki balanyń anasy bolǵandyqtan, jetkinshekterdiń bolashaǵy oılantary sózsiz. Qolǵa alynyp otyrǵan úsh tildi meńgerý bastamasyn óz basym qoldaımyn. Elordadaǵy 500-den asa bala tárbıelenip otyrǵan «Dýman» atty balabaqshada osy ıgilikti is qolǵa alyndy. Sondaı-aq «Týǵan jer» baǵdarlamasy qazirden ár balanyń sana-sezimine uıalaǵandyqtan olar keleshekte týǵan eline qyzmet jasaıtynyna senimdimin.
Dına TOQTAMYSOVA
Astana
...pikir bildiredi
О́tkir máseleni qozǵady
Elbasynyń talaı alqaly topta sóılegenin estip júrmiz. Al teledıdardan kórsetken Nursultan Ábishulynyń belgili qalamgerlermen suhbaty erekshe áserli ótkenin atap ótkenimiz abzal. О́te erkin qurylǵan suhbatta eldiń pikirlerin ashyq bildirgen úsh jazýshynyń parasatty oı-tolǵamdaryna rızamyz. Sonda aıtylǵan máselelerdiń bir-ekeýine óz pikirimdi de qosaqtaı keteıin.
Mektep oqýshylary 6 synypty bitirgenshe tek qazaq tilinde oqyǵany durys. Orys tili aptasyna bir ret qosymsha sabaq retinde júrgizilse, 6 synyptan bastap az mólsherde orys tilin, 8 synyptan bastap aǵylshyn tiline den qoıǵany durys. Osy baǵytta bolsa qazaq balalarynyń ulttyq sanasy myqtap bekı túsedi. О́z ultynyń tarıhyn, ata-babasynyń salt-dástúrin boıyna sińirip alǵan soń, eshqandaı bógde kúshke boı bermeıdi. Din jóninde, ımamdar jóninde, qazaq áıelderiniń qara jamylyp júrgenderi jaıly ashyq ári ótkir aıtqany úshin myń alǵys. Azattyq jolynda qurban bolǵandardyń esimderin jastardyń jadyna bekite berýdiń ornyna, rý-rý bolyp meshit salyp, oǵan óz rýlarynyń, kósemderiniń, baı-manaptardyń atyn qoıyp alǵandar qanshama! Keshegi Alashtyń serkeleri – eldiń kózin ashyp, namysyn qaırap, jigerine jiger qosyp ótken arýaqty aǵalar – meshit-medresede emes, adamzattyq bilim bergen mektepterden nár alyp, sanasyn bekitip, halqyna baqyt syılady.
Osyndaı parasatty oı-tolǵamdar qozǵaǵan el jaqsylarynyń ónegeli isterine rızashylyq bildiremiz.
Nurmahan NAZAROV,
Qazaqstan Jýrnalıster odaǵynyń múshesi
Túrkistan
...saqtandyrady
Ekijúzdilerge el senbeıdi
Elin tonap, baılyǵyn shetel asyryp, qazir sol elden «danyshpandyq» tanytyp jatatyndardyń kúńkilin estip jynym keledi! Olar ury! Urynyń bir sózine senbeımin! Máselen, solardyń biri Ábilıazov ult úshin, qazaq úshin nendeı jaqsylyq istedi? Elde júrip kúreskerlik tanytty ma? Bıýdjetten qomaqty qarjy urlap, búginde Eýropaǵa saıası qurban, «demokratııa jolyndaǵy kúresker» sekildi kórsetkisi keledi ózin. Bizge artynda bylyǵy joq – ary taza, aqshanyń emes, qazaqtyń muńyn muńdaıtyn myqtylar kerek! Aqshanyń bylyǵyna kómilgender ári júrsin elimizden.
Ekijúzdi, sóziniń turaǵy joq aferısterden saqtasyn! О́z ómirin bylyqqa batyrǵan adam, ana tilin meńgermegen, mıllıondaǵan salymshynyń aqshasyn qoldy etken alaıaq eldi búlikke shaqyryp, mysyqtileýlenip otyrady. Qudaı solardan saqtasyn!
Dına ELGEZEK
Almaty
...senim artady
Jastar uıymy quryldy
Jastardy rýhanı-adamgershilik ustanymdarmen qarýlandyryp, joǵary mádenı órkenıet keńistigin jasaýǵa daıyndaý baǵytynda jáne adamı qundylyqtarmen tárbıeleý úshin Mańǵystaý aýdandyq jastar resýrstyq ortalyǵy men Shetpe meshitiniń uıymdastyrýymen basqosý ótkizildi.
Basqosý maqsaty jastardyń rýhanı adamgershilik qundylyqtaryn nasıhattaý jáne «Máńgilik el» ulttyq ıdeıasyn qoldaý baǵytynda ortalyq meshit janynan qoǵamdyq negizde jastar uıymyn ashý bolyp tabyldy. Jastar biraýyzdan uıymdy ashý kerektigin jáne onyń ýaqyty jetkindigin alǵa tartyp, uıymnyń ataýyn «Iman nury» jastar birlestigi dep ataýdy uıǵardy.
Uıym mynadaı baǵyttar boıynsha maqsatty jumystar atqarýdy qolǵa alyp otyr. Olar – tulǵanyń adamgershilik, azamattyq qasıetterin kemeline jetkizý, sanaly azamattyq kózqarasyn oıatyp, elimizdiń damyp-gúldenýine maqtanysh sezimin, patrıottyq jigerin qalyptastyrý, shynaıy sheshimderdi qabyldaý mádenıetin, toleranttylyqty qalyptastyrý, óz ortasyndaǵy, qoǵamdaǵy belsendilikke, jaýapkershilikke, qaıyrymdylyqqa degen ynta-yqylasyna jol ashý, tulǵanyń úzdiksiz jetilýine tirek bolatyn qabileti men darynyn shyńdaý bolyp tabylady.
Allabergen QONARBAEV
Mańǵystaý oblysy
...jańalyǵyn jetkizedi
Jylyjaıda tropıkalyq jemis ósiriledi
Qysy-jazy jaıqalyp turatyn baq nemese tropıkalyq djýnglı. Shyǵys Qazaqstandaǵy Ýkraınka aýylynda ornalasqan jylyjaıdy dál osylaı ataýǵa bolady. Sanaly ǵumyrynda ınjener-tehnık qyzmetin atqarǵan Lıýdmıla Zemlıanaıa zeınet jasyna jetkende ómiriniń jańa belesine qadam basty. Osydan 9 jyl buryn jylyjaı ashyp, tropıkalyq jáne sýbtropıkalyq daqyldardy ósirýge den qoıady.
Eńbegi nátıjesiz emes. Oıyndaǵy ósimdikteri ósip, tańǵajaıyp baqqa aınaldy. Jylyjaıda ósimdiktiń 500-ge jýyq túri bar. Árqaısysyna erekshe kútim men qamqorlyq qajet. Kópshilikti tánti etken alyp lımondar men kishkentaı banandardy tamashalaýshylar elimizdiń túkpir-túkpirinen keledi eken.
Jalpy aýmaǵy myń sharshy metrdi quraıtyn keshen tórt toptan turady. О́ńir natýralısteri men florısteri de jylyjaıdyń turaqty meımandaryna aınalǵan. Ǵylymı jumystar boıynsha kelisim jasaý úshin elimizdiń ózge óńirlerinen de mamandar keledi eken.
Aınash KITAPBAEVA
Shyǵys Qazaqstan oblysy
