Byltyr Iаlta qalasynda ótken «Detskaıa novaıa volna» atty halyqaralyq án baıqaýyna qatysqanǵa deıin Ámına Japardy qazaqstandyq ónersúıer qaýym jap-jaqsy bilip qalǵan bolatyn. Aldymen oblystyq, odan keıin «Aıalaǵan Astana-2017» respýblıkalyq saıysta top jarǵan. Qazylar alqasy on jastaǵy oqýshynyń eshkimge uqsamaıtyn keń dıapozondy daýsyna erekshe tánti bolyp, biraýyzdan Gran-prıge laıyq dep sheshken.
Ol jastaıynan ónerli áýlet ortasynda tárbıelenip, án qanatynda terbelip ósti dese de bolady. Ájesinen bir eli ajyramaıtyn. Qaıda barsa da tompańdap erip júretin. Keı tetelesteri sııaqty oıyn qyzyǵyna berilgennen góri ońashada án shyrqaǵandy unatatyn. Polısııa qyzmetkeri bolyp qyzmet atqaratyn ákesi Saıran – birinshi mamandyǵy boıynsha mýzykant. Dombyra qulaǵynda sheber oınaıdy. Qyzynyń boıyndaǵy qabiletti erte ańǵaryp, fortepıano synybyna berdi. Talant qyrynyń ashylýyna Vera Pogorelova, Olga Elıseeva sekildi pedagogter kóp ter tókti. Olardyń eńbegi zaıa ketken joq. Ámına talaı báıgelerde juldyzdaı jarqyrap, ózi týyp-ósken túkpirdegi aýyldyń namysyn abyroımen qorǵap júrdi.
Qalaı desek te Qyrym sapary onyń ómirinde úlken iz qaldyrdy. Aıtýly beleske aınaldy. Úlken sahnaǵa alǵash kóterilse de, kórermenderge lyq toly zaldan esh ımenbegen. Tek «Ámına Japar. Qazaqstan» degende az-kem qobaljyp, biraq boıyndaǵy qorqynyshty lezde jınap alǵan. Aldyńǵy qatarda otyrǵan ájesine kózi túsken. Onyń baısaldy, nyq otyrysy jeńiske degen senimin ushtaı túsken. Ásem án áýeni syrtqy dúnıeni múldem umyttyryp jibergen. Qazylar alqasynyń altaýy – 10, ekeýi 9 degen baǵany kótergende zal ishin dý qol shapalaq kómip ketken. Bul bolsa arqasynan aýyr júk túskendeı jeńildenip sala bergen. Al Tına Ternerdiń shyǵarmasyn keremet oryndaǵanyna súısingeni sonshalyq, qazylar alqasynyń múshesi Lera Kýdrıavseva bir balyn kemitip qoıǵanyna qatty ókinish bildirgen.
Jýyrda oblystyq ishki ister departamentiniń bastyǵy, general-maıor Berik Bilálov Japarovtar otbasyn arnaıy qabyldap, Ámınaǵa noýtbýk syılady. Áke-sheshesine alǵys hat tabys etti.
Juldyzdaı jarqyrap, án álemine qanat qaqqan ony qazir reseılik tanymal prodıýser Lına Arıfýlına attaı qalap alyp, óner atty uly qudirettiń qyr-syryna baýlyp júr.
Mádına BALǴAShOQOVA
Soltústik Qazaqstan oblysy
