Osy jylǵy Joldaýda Qazaqstannyń Tórtinshi ónerkásiptik revolıýsııa dáýirine tabysty áleýmettik beıimdelýi úshin jańa mindetter anyqtalǵan. Jańǵyrý kezeńinde osy mindetterdi sátti júzege asyrý úshin kásipodaqtar ýaqyt synyna sáıkes jańa damý baǵytyn anyqtaýy qajet. Iаǵnı kásipodaqtar áleýmettik-eńbek qatynastary men áleýmettik seriktestik máselelerin kóterýge jáne sheshýge qabiletti qýatty jáne jasampaz qoǵamdyq ınstıtýt bolýy tıis.
Baspasóz máslıhaty barysynda KF tóraǵasy Baqytjan Ábdiraıym kásipodaqtardyń qazirgi qyzmeti men Memleket basshysy Joldaýyn júzege asyrý barysyndaǵy bolashaq josparlar týraly aıtty.
Sondaı-aq spıkerler zamanaýı damýdyń basty trendi áleýmettik-eńbek qatynastaryn ózektendirý ekendigin atap ótti. Osy sebepti, kásipodaqtar jumys oryndarynyń saqtalýy, eńbekti tıimdi qorǵaý, eńbekaqyny ýaqtyly tóleý, óndiristik jaraqattanýshylyqtyń
aldyn alý máselelerin jedel túrde sheshýi tıis.
«Búginde eńbek naryǵyn turaqtandyrý maqsatynda Qazaqstan kásipodaqtary jumys berýshilermen tyǵyz jumys atqarady. Elbasy Joldaýynda qoıǵan 10 mindet árqaısymyzǵa baılanysty. Ol eldiń alǵa damýy jolynda jasalǵan basym baǵyttar. Qazirgi tańda elimizde qarqyndy qaryshtaý prosesi júrip jatyr. Álemdik tehnologııalar enip, kúndelikti turmysymyz jeńildeýde. Tipti adamnyń basqarýynsyz júretin kólikter de shyǵyp jatyr. Endi ol da bizdiń elge eneri sózsiz. Odan keletin qaýip, bul jumyssyzdyqqa ákelip soǵady. Sol sebepti biz jan-jaqty jumys istep jatyrmyz. Kásipodaqtarmen júzege asyrylyp jatqan sharalar jalpy elimizdegi áleýmettik-ekonomıkalyq damýdyń mańyzdy faktory retinde kórsetilgen adam kapıtalynyń sapasyn arttyrýǵa múmkindik týǵyzady», dedi Kásipodaqtar federasııasynyń tóraǵasy Baqytjan Ábdiraıym.
Raýan QAIDAR,
«Egemen Qazaqstan»
