Jármeńkege Imanjúsip Qutpanuly aǵasyna erip Qajymuqan balýan da keledi. «Dalanyń bulshyq eti» atanǵan alyp kúsh ıesin kórgen jurt máz. Kezek-kezek qonaq qylyp kútedi. Qajekeń ánshi Maıra Ýálıqyzynyń syrnaılatyp salǵan ánin tyńdap, ózi de bir dúrkin tarǵyl daýysymen Balýan Sholaq aǵasynyń ánin aıtyp, reti kelgende sırkte úırengen nebir ǵajaıyp ónerin kórsetedi.
Qajekeń osylaı bir úıdiń tórinde tasyp-shalqyp, qymyzǵa eltip otyrsa, esikten shynashaqtaı shal kirip kelip:
– Áı, úıgen boq, nemenege tórde shaljıyp otyrsyń, myna shańyraq ıesi menmin, atyp-turyp nege sálem bermeısiń? – dep, shaqyldaıdy. Istiń baıybyn ańǵarmaǵan balýan shaqar shaldy kóterip alyp, «shańyraq ıesi bolsańyz mende neńiz bar, shańyraqta otyrmaısyz ba» dep ashyq turǵan túńilikten kóterip alyp shyǵaryp jiberedi. Kórgen el kúlip, jyrǵap jatyr.
Bul shalyń ońaı-ospaq adam emes. Sonaý Kenesary kezinde Qarasor óńirine aýyp kelgen az úı qypshaqtyń qadirli aqsaqaly eken. Tipti onyń bir aýyz sózin ataqty Imanjúsiptiń ózi jerge tastamaıtyn qadiri bar. Ony Qajekeń bilmegen. Shaqar shal shaýyp Imanjúsipke barady:
– Ana aqymaq iniń meni kóptiń kózinshe mazaq etti?
Imekeń qaharyna minedi. Qabaǵynan qar jaýyp aqsaqaldy aldyna salyp balýan otyrǵan úıge keledi.
– Eı, Qajymuqan, shyq úıden!
El abdyrap qalady. Esik aldynda qarshyǵadaı shúıilip Imekeń tur. Qajekeń de ózinen bir aǵattyqtyń ketkenin dereý ańǵarady. Úıdegi elge basý aıtyp, aǵama ózim jalǵyz baraıyn dep tabaldyryq attaıdy.
– Aldııar aǵa!
Atan túıedeı alp-alp basyp jetip kelgen inisine Imekeń «myna aqsaqaldy tanısyń ba?» dep qamshynyń ushymen manaǵy shynashaqtaı qarııany nusqaıdy.
– Tanymadym kóke!
– Tanymasań mynaý, dep Imanjúsip dyrý qamshymen inisiniń jon arqasyn kózdep, lypyta bir tartady da atynyń basyn buryp júre beredi. Qamshynyń qýaty sondaı Qajymuqan balýan qıralań etip, shóke túsip otyryp qalady. Qarap turǵan qaýym, «Iаpyrym-aı, batyr sizdi qatty urdy-aý» dep, janashyrlyq tanytady. Sonda Qajekeń:
– Aǵam meni qamshymen jaı ǵana sıpap ótti emes pe, shyn ursa qaq bólinip qalmaımyn ba? – depti.
Bul oqıǵadan ne túıemiz: munda aǵa men ininiń tereń syılastyǵy jáne qazaq dástúriniń som tulǵasy jatyr.
Beken QAIRATULY,
«Egemen Qazaqstan»
