Q. Toqaevtyń el Prezıdenti Djoko Vıdodomen kezdesýi sapardyń basty oqıǵasy boldy.Memleket basshysy N. Nazarbaevtyń tapsyrmasy boıynsha Senat Tóraǵasy Indonezııa basshysyna bıylǵy qazan aıynda Qazaqstanǵa resmı saparmen kelýge shaqyrýyn jetkizip, Álem jáne dástúrli dinder lıderleriniń VI Sezine qatysýǵa shaqyrýdy tabys etti. Q.Toqaev Astanadaǵy dinaralyq forým din kóshbasshylarymen qatar álemdik deńgeıdegi saıasatkerler de bir ústel basynda bas qosatyn únqatysý alańy retinde moıyndalǵanyn atap ótti. Sezd jumysyna BUU Bas hatshysy, kóptegen memleketterdiń basshylary, halyqaralyq uıymdardyń jetekshileri qatysty.
Senat Tóraǵasy jer júzindegi iri musylman memleketi basshysynyń Astana forýmyna qatysýy, ıslam álemindegi Indonezııanyń mańyzdy rólin eskere kelgende, «Dinı qaıratkerler qaýipsiz álem jolynda» taqyrybyna arnalǵan aldaǵy sammıttiń tabysty ótetinine yqpal etetinin atap ótti.
Q.Toqaev ekijaqty qatynastardyń keleshegi týraly aıta kelip, Qazaqstan Ońtústik-Shyǵys Azııadaǵy jetekshi elderdiń biri – Indonezııamen jan-jaqty ári ózara tıimdi yntymaqtastyqty damytýǵa erekshe mańyz beretinine nazar aýdardy. Keıingi jyldarda ekijaqty qatynastardyń barlyq baǵyttary boıynsha, atap aıtqanda, saýda-ekonomıkalyq, aımaqaralyq yntymaqtastyq, mádenı-gýmanıtarlyq jáne parlamentaralyq ózara is-qımyl salalarynda oń ózgerister kórinis taýyp otyr.
Q. Toqaev iske qosylatyn jańa kólik-logıstıka baǵdarlarynyń keleshegine, birinshi kezekte Qazaqstannyń «Nurly Jol» baǵdarlamasy men QHR-dyń «Jibek jolynyń Ekonomıkalyq beldeýi» bastamasynyń ushtasý josparyna baılanysty jańa múmkindikterge toqtaldy. Atap aıtqanda, «Qazaqstan - Lıanıýngan porty (QHR) – Azııa-Tynyq muhıty aımaǵyndaǵy teńiz porttary» kólik dáliziniń múmkindikteri saýda-ekonomıkalyq yntymaqtastyǵyn tereńdetýge yqpal etetin bolady.
Islamdyq qarjylandyrý salasyndaǵy Indonezııanyń mol tájirıbesin eskere otyryp, Qazaqstan tarapy Astana halyqaralyq qarjy ortalyǵynyń aıasynda Indonezııa qarjy ınstıtýttaryn jumysqa tartýǵa yqylas bildirip otyr. Memleket basshysy Astana halyqaralyq qarjy ortalyǵy qyzmetiniń basym baǵyttarynyń biri retinde ıslam qarjylandyrýyn ataǵan bolatyn.
Djoko Vıdodo óz kezeginde Qazaqstanǵa shaqyrýyna oraı Prezıdent N. Nazarbaevqa alǵys aıtty ári saıası, ekonomıkalyq jáne mádenı ekijaqty baılanystardy ulǵaıtý maqsatynda barlyq sharalardy qabyldaý jónindegi nıetin jetkizdi.
Qazaqstan Senatynyń Tóraǵasy men Indonezııa Halyq keńesshileri kongresiniń Tóraǵasy Zýlkıflı Hasanmen áńgimesiniń taqyryby parlamentaralyq baılanystardy nyǵaıtýdyń keleshegi týraly boldy. Q.Toqaev Qazaqstannyń saıası júıesiniń erekshelikteri týraly habardar etip, Parlament joǵarǵy Palatasynyń konstıtýsııalyq ókilettikteri jaıynda áńgimelep berdi. Indonezııa tarapy Qazaqstannyń prezıdenttik bes áleýmettik bastamasyn iske asyrýdaǵy jospary men saıası jáne rýhanı jańǵyrý baǵdarlamasyna erekshe yqylas bildirdi.
Q. Toqaevtyń Indonezııa Halyq ókilderi keńesiniń Tóraǵasy Bambang Sýsatıomen kezdesýinde zań shyǵarý organdarynyń únqatysý máseleleri áńgime ózegine aınaldy. Áńgime barysynda Qazaqstan men Indonezııanyń ózara yntymaqtastyǵyn nyǵaıtýdaǵy parlamentaralyq quramnyń mańyzdy róli atap ótildi. Q. Toqaev eki eldiń zań shyǵarý organdarynda qyzmet etetin depýtattyq dostyq toptarynyń jumysyn óristetýge shaqyrdy.
Q.Toqaevtyń sapar baǵdarlamasy boıynsha Indonezııa Vıse-prezıdenti Iýsýf Kallamen kezdesýi 14 naýryzǵa belgilendi.
Qazaqstan delegasııasy mádenı baǵdarlama aıasynda Jakartadaǵy Ulttyq táýelsizdik monýmentinde jáne «Taman Mını Indonezııa» parkinde boldy.
