Qaraǵandyda halyqaralyq «Roboland-2018» festıvali aıaqtaldy

Festıvaldiń ashylý sal­ta­natyn­da sóz sóılegen Bilim já­ne ǵylym vıse-mınıstri Ashat Aımaǵam­betov Memleket basshysy­nyń bilim berý salasyn damytý boıyn­sha bergen tapsyrmalary men alǵa qoıǵan mindetterin eske saldy. Osy sharýalar aıasynda elimizdiń 800 mektebine zerthanalar qoıylyp, robot-tehnıka bo­ıynsha fakýltatıvtik kýrstar engizilgenin habarlady. «2020 jylǵa deıin respýblıkanyń barlyq mektebi robot-tehnı­kamen, zerthanalarmen, baǵdar­lamalaýmen qamtamasyz etile­di», dep málimdedi ol.

Halyqaralyq deńgeıdegi sha­ra­nyń shymyldyǵy robot-teh­nıkaǵa arnalǵan kerek-jaraq, qu­ral-jabdyq, ádis­te­melik mate­rıal­dar qoıyl­ǵan kórmemen ashyl­dy. Mun­­­­­­­da­ 3D-prınter ar­qyly ból­­­­­­shek­­­teri shyǵarylyp, qurastyrylǵan ónimder, bala­larǵa jınastyrýǵa arnal­ǵan robottyń bazasy, vırtýaldy álemniń ishine engizetin quryl­ǵylar jáne alysty aldyńa alyp keletin kvadrokopterler kórermen nazaryna usynyldy.

Bıylǵy festıvalǵa Pol­sha, Reseı, Qyrǵyzstan jáne Qazaq­stannan kelgen 771 ko­­­man­da qa­tysyp, bolashaq ınjenerler 32 atalym boıynsha baq synady. Qo­­­lynan óner tamǵan órender 3D prın­teri­niń kómegine súıenip túr­li model­derdi jasap shyǵarsa, mek­tep jasyna deıingi balaqaılar robot­­tardy qurastyrýmen aı­na­lysty. Sondaı-aq jas­ós­pirimder vır­týaldy shyndyq shle­mi jáne basqarý saýsaqtary arqyly robot modelderin jınastyrdy.

Jalpy, «Roboland-2018» fes­tıvali bastalmas buryn ob­lys­­tyń mańdaıaldy ǵalymdary men belsendi ustazdary dóńge­lek ústel basynda jıyn ótkiz­gen bolatyn. Ondaǵy maqsat – mektepterdegi robot-tehnıka zerthanalarynyń bazasynda tehnoparkter qurý jaıyn­ talqylaý edi. Saıyp kelgende, bul joba iske asyp jatsa, oblys oqýshylarynyń robot qurastyrý arqyly zııatkerlik bilimi jetile túser edi degen pikir biraýyzdan aı­tyldy jıyn ústinde.  

Qazirgi tańda jalpy bilim berý salasynda robot-tehnıka erekshe mańyzǵa ıe bolyp, bul jobaǵa basa kóńil bóline bastaǵany belgili. Bilim jáne ǵylym mınıstrliginde robot-tehnıkany damytý máseleleri boıynsha respýblıkalyq úılestirý keńesiniń qurylǵany sózimizge dálel. Atalǵan keńes­tiń quramyna memlekettik or­gandardyń, úkimettik emes uıymdardyń ókilderi, ata-analar qoǵamynyń músheleri men ǵalymdar engen. Sonymen qa­tar Úkimettiń tapsyrmasy boıynsha, bıyl  robot-tehnıka boıynsha halyqaralyq, respýblıkalyq jáne aımaqtyq saıystar ótkizýdiń jol kartasy ázirlenip, bekitildi. Iаǵnı  aldaǵy ýaqytta elimizdiń bar­lyq óńirinde robot-tehnıkany damytý boıynsha aýqymdy jobalar  qolǵa alynbaqshy. Dóńgelek ústel barysynda oblys ustazdary sıfrly júıege kóshý, tehnologııalardy, robot-tehnıkany, sonymen birge bilim berý robot-tehnıkasyn damytý máseleleri boıynsha óz pikirlerin ortaǵa saldy. 

Sonymen festıvaldiń úshin­shi kúni osymen tórtinshi márte ótip turǵan  halyqaralyq robot-tehnıka, baǵdarlamalaý jáne ınnovasııalyq tehnolo­gııalar saıysynyń qory­tyndysy shyǵaryldy. Jal­py­komandalyq esepte Qara­ǵandy oblysynyń ujymy 165 medaldi jeńip alyp, qarsylastarynan qara úzdi.  Júldeli ekinshi orynǵa qor­jy­nyna 19 medal salǵan Aq­mola oblysynyń komandasy, al úshinshi oryndy elorda komandasy qanaǵat tutty. Astanalyqtardyń enshisinde – 17 medal.

Memleket basshysy «Pre­zıdenttiń bes áleýmettik bas­tamasy» atty halyqqa Ún­deýinde 2018-2019 oqý jylynda taǵy 20 myń grant bólý kerektigin aıtty. «Bul tórtinshi ónerkásiptik revolıýsııa jaǵdaıyndaǵy jańa ekonomıkada zor suranysqa ıe bolatyn san myń jańa mamandy daıarlaýǵa múmkindik beredi. Munda eń aldymen ınjenerler, aqparattyq tehnologııa, robot-tehnıka, nanotehnologııa salasynyń mamandary týraly sóz bolyp otyr. Bul da jastarǵa mem­leket qamqorlyǵynyń aıqyn kórinisi», degen bolatyn Elbasy. Osy turǵydan kelgende, Qaraǵandyda ótken halyq­aralyq «Roboland-2018» festıvaliniń zamanaýı tehno­logııanyń ushar bıigine talpyn­ǵan zerdeli jasqa bereri kóp dep senimmen aıtýǵa bolady.
 
Qaırat ÁBILDA,
«Egemen Qazaqstan»

QARAǴANDY

Sýretti túsirgen
Lınar GALIMOV