«Otello» tragedııasynyń – Ý.Shekspır shyǵarmashylyǵynan alar orny aıryqsha. Shym-shytyryq qaıshylyqqa qurylǵan kúrdeli dramatýrgııany ıegerý – qaı kezde de akterler úshin úlken mektep hám asa zor jaýapkershilik bolǵan. Shyǵarma sol tuǵyrynan tıtteı de túsken joq. Áli de qundy, áli de ózekti, áli de qyzyqty. Qazaq teatr sahnasynda Elýbaı О́mirzaqov, Qapan Badyrov, Sháken Aımanovtar keskindegen Otello beınesin búginde dástúr sabaqtastyǵyn úzbeı, abyroıly jalǵap kele jatqan teatrdyń beldi akteri, Qazaqstannyń eńbek sińirgen qaıratkeri Qýandyq Qystyqbaev, Dezdemona beınesin náziktigi men sulýlyǵy bir arnada toǵysqan jas aktrısa Aqmaral Tanabaeva keskindedi.
Iаgo beınesi Qazaqstannyń eńbek sińirgen qaıratkeri Núrken О́teýilovtiń saraptaýynda beınelilik bıiginen kórindi. Qazaqstannyń halyq ártisi Tilektes Meıramov Brabansıo róli arqyly akterlik ónerdiń taǵylymyn tanytty.
Astanalyq Qallekı teatrynyń úzdik akterleri men kásibı mamandary tartylǵan qoıylym teatr ujymy úshin de, kórermen úshin de shyn máninde rýhanı merekege aınaldy. M.Áýezovtiń qazaqy qunarǵa baı beıneli tilinde ún qatqan Shekspır jaýhary elordalyq kórermenniń kóńiline berik bekip, óner oqıǵasyn tamashalaýǵa jıylǵan jurt rıza bolyp tarqasty.
Nazerke Jumabaı,
«Egemen Qazaqstan»
