Áýeli qolynan is keledi-aý degen óz aýylynyń qurylysshy jigitterin ákeldi. Álgiler bir apta júrdi me, joq pa, at basyn aýylǵa qaıyra burǵan. Keıin taǵy bir brıgada keldi. Ylǵı qazaqtar. Olar da bir aptaǵa jeter-jetpes ýaqyt irgetas quıatyn or qazdy. Tolyq aıaqtaǵan joq. Basyn bastady da, qaıtyp qarasyn kórsetpedi. Bir yńǵaıy kelgende kórshimen tildeskenbiz.
– Qoı, búıtken qurylysshylary bar bolsyn, kún saıyn suranady da turady. Pálensheniń toıy, túgensheniń jabdyǵy dep. Qolyna kúrek ustamaı jatyp «aqsha tólemeısiń be?» dep ajyraıady, – deıdi ol.
О́kinishin túsingenbiz, ýaqyt ótip barady. Qara kúzge deıin tóbesin qalqaıtyp alsa, ishki jumystaryn keıin-aq jasaı beredi ǵoı.
Arada úsh-tórt kún ótken soń jańa qurylys ornynda jypyrlap júrgen jap-jas jigitterdi kórdik. О́zbektiń bozbalalary eken. Mundaı eńbekqor bolar ma, bozala tańnan qashan kóz baılanǵansha bel jazbaıdy. О́zderi tipti jarytyp as ta ishpeıdi-aý deımin.
Elden úlken aǵaıdyń balasy kelgen. О́ziniń aıtýyna qaraǵanda, qaladan yńǵaıly jumys qaramaq. Aǵamnyń úıinde bala basy barshylyq. Sabaýdaı jeteýi otyr. Jeteýdiń bireýi ǵana shańyraq kótergen, qalǵandary salt basty, sabaý qamshyly. Bul kelgeni – ortanshysy. Bizdiń tuqym súıekti ǵoı, otyzdy ortalap qalǵan inim qozyqaryn baılapty, eki ıyǵyna eki kisi mingendeı, jaýyryny qaqpaqtaı.
Osharylyp on kún jatty. Jumys taptyń ba dep, jeńgesi suraı qalsa, qabaǵyn kirjiń etkize túsedi. Qaıtyp suraǵan joqpyz, birtúrli uıat.
О́z-aǵamnyń órenderi tań atpaı qumyrsqa tirshilikke kirisedi. Qurylys bolǵan soń qaýyrt tirliktiń úni de shyqpaı tura ma, irgedegi qańǵyr-kúńgirge etimiz úırene bastady. Úırene almaǵan álgi aýyldan kelgen inimiz. Tús aýǵansha uıyqtap úırengen paqyr tóseginde jata almaı júr.
Álgi qurylysshylar aınaldyrǵan on kúnniń ishinde úıdiń irgetasyn quıyp, qabyrǵasyn da kóterip tastady. Kirpishten qalanatyn qabyrǵany kóterý op-ońaı eken ǵoı. Kirpishi úlken bolǵan soń, isi de ónimdi. Qazir shatyryn jaýyp jatyr. Úı ıesi jer qazatyn traktor, zat kóteretin kran suramaıdy eken dep maqtap qoıady.
Inim keshe aýylǵa attandy. О́zbek balalarynyń tynym bilmes tirshiligi tóseginde tynysh jatqyzbady-aý deımin. О́kinishtisi, ónegesin úırengen joq, ókpelep ketti.
Baıqal BAIÁDIL,
«Egemen Qazaqstan»
Aqmola oblysy
