Keshe Qazaq eli taǵy bir bıikke kóterildi. Eldiktiń eseıýiniń kezekti saltanatyna kýá boldyq. Elbasy týraly sóz Elbasynyń ózinen buryn eldiń ózine kóbirek kerek edi. Sol sóz aıtyldy. Kóptiń kóńili ornyna tústi. Alǵa umtylatynymyz utymdy túsindirildi.
Qazaqstan Respýblıkasynyń Prezıdenti Qasym-Jomart Toqaevtyń Parlament palatalarynyń birikken otyrysyndaǵy sózinde aıtylǵan baǵalardan keıin Elbasy eńbegine baılanysty pikir qosý qıyndap ta qaldy. Degenmen, jaqsynyń jaqsylyǵyn aıtyp, nuryn tasytý – parasat paryzy.
Qırandydan, qulandydan memleket qurý, qoǵamdy bir formasııadan ekinshi formasııaǵa aýystyrý, qıly kezeńdegi qıynshylyqtardan eseńgireı jazdaǵan halyqty tar jol, taıǵaq keshýden aman-esen alyp ótý, eldi aıaǵynan tik turǵyzý, birneshe álemdik qarjy daǵdarysynan burynǵydan da shıratyp, shynyqtyryp shyǵarý, Batys ta, Shyǵys ta moıyndaıtyn, sanasatyn, qurmetteıtin elge aınaldyrý, san túrli sebeptermen birneshe ǵasyr boıynda dúnıejúzilik órkenıetten shettetilip qalǵan eldi jer jahanǵa tanytý, tipti EQYU tarıhynda alǵash ret azııalyq memleketti, alǵash ret TMD memleketin, alǵash ret halqynyń negizgi bóligi musylman dinin ustanatyn túrkitildes ult uıysyp otyrǵan memleketti Eýropaǵa tóbe bı bolatyndaı bıikke kóterý, 56 eldiń basyn biriktiretin bedeldi uıymǵa tamasha tóraǵalyq jasaý jáne sol uıymnyń on bir jyldan beri shaqyrylmaı júrgen sammıtin uıymdastyrý, Astana deklarasııasyn qabyldanýyna qol jetkizý, EKSPO syndy álemdik kórmeni uıymdastyrý quqyn azýy alty qarys eldermen jantalasty básekede julyp alyp shyǵý, dúıim dúnıe kóz tikken sol synaqtan abyroımen ótý, dúnıeni dendep turǵan daǵdarystar daýylynda, óz elin naǵyz turaqtylyq aralyna aınaldyrý, osynsha jyl boıy halqynyń tańyn tynysh atyryp, keshin tynysh batyrý, oǵan qosa álemniń qıyr-qıyryndaǵy daý-damaıdy retteýge aralasý, memleketaralyq mámileger bıigine kóterý, elimizdiń álemniń eń bedeldi uıymynyń eń qýatty qurylymyna – BUU-nyń Qaýipsizdik Keńesine turaqty emes múshelikke Ortalyq Azııa óńirinen birinshi bolyp saılanýyna, óziniń beıbitshil, jańashyl usynystary BUU aıasynda qabyldanýyna qol jetkizý, basqa da qyrýar sharýany shyp-shyrǵasyn shyǵarmaı sheshý, eń bastysy – eldiń ekonomıkalyq qýatyn san eselep arttyrý, eń eńseli elýlikke ený mindetin merziminen buryn atqarǵan soń eń ozyq otyzdyqqa umtylý, sol jolda naqty qadamdar jasaý, halyqtyń rýhyn jańǵyrtý, adamdardyń janyn jańalaý tek ulttyń uly perzentiniń ǵana qolynan keledi. Muny ashyp aıtý bizdiń aqıqat aldyndaǵy paryzymyz. Osynyń bárin syǵymdap jetkizgeni úshin el Prezıdentine bólekshe razylyǵymyzdy aıtqymyz keledi.
Osydan toǵyz jyl buryn biz el gazeti Egemen Qazaqstan-nyń materıaldarynan qurastyrǵan «Elbasy» atty qomaqty kitapqa jazǵan alǵysózimizde «Elbasy» sózin «Prezıdent» sóziniń qazaqy balamasyndaı ǵana qaraý uǵymnyń maǵynasyn taryltatynyn aıta kelip: «El basshysynyń bárin Elbasy deýge bolmaıdy. Elbasy – eldiń basy. Eldiktiń basy. Eldiń, eldiktiń basynda, bastaýynda turǵan adam. El bolýdy bastap bergen, eldi ornatyp bergen adam. Elbasy – memleketqurýshy» dep jazǵan edik. Qasym-Jomart Toqaev Elbasy uǵymyna baılanysty da bıik baılamyn bildirdi. Munyń ózi saıasattaǵy sabaqtastyqtyń saqtalatynyn ǵana emes, eldiń keler kúnge úkilegen úmitiniń aqtalatynyn da kórsetedi.
Saýytbek ABDRAHMANOV,
Májilis depýtaty
