Jas otaýdyń toıy ótken soń, tirshilik bastaldy. Gúldanaǵa aýylda zańgerlik jumys joq. Ne isteıdi? Aýylǵa kelin bolyp túsip, qalaǵa qaıta ketemin degendi qalaı aıtady? Namysy bar jigit Nurlan da kelinsheginiń sońynan qalaǵa ketemin dep aıtpaıtynyn biledi. Eki jasqa tyǵyryqtan shyǵýdyń bir-aq joly bar edi. Bul – aýylda óziniń isin ashý bolatyn. Aýylda qalǵan jastardyń kóbi maldy kásip etedi. Biraq Nurlannyń negizgi qyzmeti bolǵan soń, mal ósirýge múmkindik joq edi. Gúldana úıde otyryp, kóp oılandy. Ol kásipkerliktiń qyzmet kórsetý túrine toqtady. Aýylda qoǵamdyq monsha joq. Al salamatty ómir saltynyń ózi tazalyqtan bastalmaı ma? Gúldana joldasyna monsha salýǵa bekinetinin aıtty. Al onyń jón-jobasyn bilý qazir asa qıyndyq týdyrmaıdy. «Atameken» kásipkerler palatasynyń «Bastaý» oqý kýrsyna baryp oqydy da, kásipkerlik negiziniń barlyǵyn bilip aldy.
– Meniń bastamam «Atameken» kásipkerler palatasynyń aýdandyq fılıalyndaǵy mamandarǵa unady. Ol úshin kádimgideı qurylys júrmeıdi, qaı jerge qalasań, sol jerge qoıa salasyń. Ol úshin býmalanǵan qujat jınaýdyń keregi joq. Monsha qashanda, qaıda da bolsa kerek. Kelin bolyp túsken aýylym maǵan rahmetin aıtyp jatyr, – deıdi Gúldana.
Gúldana Kýzaıbınaǵa «Atameken» kásipkerler palatasynyń aýdandyq fılıaly kredıt alýǵa kómektesti. Ol jeńildetilgen memlekettik baǵdarlama aıasynda 1 mln 600 myń teńge alyp, oǵan modýldik monsha qurdy. 2000 turǵyny bar Moskva aýyldyq okrýgi úshin monshanyń jetildirilgen bul túri jaqsy jańalyq boldy. Monshanyń rahatyn aýyldastary kórip otyr.
«Kelinniń – aıaǵynan, qoıshynyń – taıaǵynan» degen osy. Aýylǵa salamatty ómir saltynyń kórinisin ákelgen jas kelin jaqynda ǵana shekesi torsyqtaı ul taýyp, aıaq-qolyn baýyryna alyp jatyr. Aýylǵa aıaǵy qutty kelinder túsip tursa, aýyldastardyń qýanyshy da, súıinishi de munymen toqtamas.
Qostanaı oblysy,
Qostanaı aýdany
