«Qalalyq ákimdik ınvestorlarmen birlese otyryp, Mamandandyrylǵan Halyqqa qyzmet kórsetý ortalyǵy aýmaǵynda jańa aýrýhana turǵyzý josparlanýda. Sonymen qatar «Úıdegi dáriger» tujyrymdamasy da sátti júzege asyrylýda. Ondaǵy maqsat – ambýlatorııalyq ortalyqtyń halyqqa qoljetimdi jerde bolýy. Odan bólek, ótken jyly №5 «Otbasylyq densaýlyq» ortalyǵy ashyldy. Ol óz kezeginde «Kóktal-2»-niń 17 myń turǵynyn medısınalyq qyzmetpen qamtydy. Ústimizdegi jyly «Kóktal-1»-den 15 myń turǵyndy qamtıtyn taǵy bir «Otbasylyq densaýlyq» ortalyǵyn ashý múmkindigi qarastyrylýda» dedi Saryarqa aýdanynyń ákimi Erǵalı Egemberdi.
Onyń aıtýynsha, aýdan kóleminde 26 densaýlyq saqtaý nysany jumys isteıdi.
«Búginde bizdiń aýdanda 26 densaýlyq saqtaý nysany bar. Onyń 14-i – memlekettik mekeme. Ishinara aıtar bolsaq, 6 emhana jáne onyń 4 fılıaly, 1 perınataldyq ortalyq, JQTB-ǵa qarsy kúres ortalyǵy, dermatologııa ortalyǵy jáne 7 qalalyq jekeshelendirilgen jedel medısınalyq járdem stansııasy. 2019 jyly aýdanymyzda 8 264 sábı dúnıege keldi» dedi ol.
