Aýǵanstan soǵysy jaýyngerleriniń odaǵy qurylǵanyna bıyl 30 jyl jáne Astanaǵa 15 jyl tolýyna oraı Semeıge atty jasaq marafony kelip jetti. Sherý Taldyqorǵan qalasynan bastaý alǵan eken. Olar qyrkúıektiń 6-syna deıin qazaqtyń jeti túrli asyl tuqymdy tulparyna minip, 3065 shaqyrymdy júrip ótpek. Shabandozdar Almaty oblysynyń 9,10 synyp oqýshylary. Osy aksııanyń uıymdastyrýshysy Shormaq Ilııasovtyń aıtýynsha, keler jyly Aýǵanstan jerinen keńes áskerleriniń shyǵarylǵanyna 25 jyl tolady. Al eki jyldan soń Uly Jeńistiń 70 jyldyǵy toılanbaq. Biz ár qalada ınternasıonalıst jaýyngerlermen jáne «Nur Otan» partııasynyń ókilderi men «Jas Otan» jastar qanatynyń múshelerimen osyndaı keremet sátterde kezdesýdemiz, alǵan áserimiz de óte jaqsy, deıdi ol.
Semeıde ótken mıtıngke qatysqan olar jaýynger-ınternasıonalısterge arnalǵan monýmentke gúl shoqtaryn qoıyp, bir sát qaza tapqandardy eske aldy. Sosyn atty sherý Jeńis saıabaǵyna baryp, taǵzym etip, Túıemoınaq aralynda «О́limnen de kúshti» monýmentine deste gúlder apardy. Bular Semeıden keıin Pavlodar, Astana, Qaraǵandyǵa jáne Jambyl oblysyna jol tartpaq.
Raýshan Nuǵmanbekova.
SEMEI.
