Seısenbige qaraǵan túnde Izraıldiń kýrortty Eılat qalasyna Egıpet jaǵynan úsh zymyran jiberilgen. Onyń ekeýin «Temir kúmbez» atty zymyranǵa qarsy júıesi ustap qalsa, úshinshisi eldiń adam qonystanbaǵan aýdanyna qulaǵan.
Eılat qalasy zymyranmen atqylandy
Seısenbige qaraǵan túnde Izraıldiń kýrortty Eılat qalasyna Egıpet jaǵynan úsh zymyran jiberilgen. Onyń ekeýin «Temir kúmbez» atty zymyranǵa qarsy júıesi ustap qalsa, úshinshisi eldiń adam qonystanbaǵan aýdanyna qulaǵan.
Zymyran úshin jaýapkershilikti Sınaı túbeginde is-áreket jasaıtyn Ansar Beit al-Magdis salafıstik toby óz moınyna alǵan. Sodyrlar ázirge qandaı da bir resmı málimdeme jasamaǵan kórinedi. Osy oraıda «Temir kúmbez» zymyranǵa qarsy júıesiniń ushyp kele jatqan zymyrandy ustap qalý múmkindiginiń 90 paıyzdan astam ekendigin aıta ketý qajet. Árbir ustap qalýshy zymyrandy ushyrý shamamen 40 myń AQSh dollaryna túsedi eken.
Tuńǵysh ret áıel vıse-prezıdent boldy
Iran Islam Respýblıkasynyń jańa prezıdenti názik jandylar ókilderine keń jol ashyp otyr. El prezıdentiniń aıtýynsha, vıse-prezıdent bolyp taǵaıyndalǵan Elham Amınadze qajetti ǵylymı bilimderge ıe jáne zańnama salasynda tájirıbeli.
Inaýgýrasııa kezinde sóılegen sózinde Hasan Roýhanı áıelderge úlken quqyqtar beretinin málimdegen bolatyn. Sondaı-aq, ol hıdjab kımeıtin názik jandylar ókilderine qatysty teris kózqarastardy da syn tezine aldy. Kóbine-kóp qatań konservatıvtik normalarǵa sáıkes kıinetinderge qaraǵanda, hıdjab kımeıtin áıelderdiń ar-uıattary áldeqaıda ústemirek bolady, dep atap kórsetken ol. Onyń syrtynda Roýhanı áıelderdiń ekonomıka men saıasattaǵy quqyqtaryna qysym jasaýshylyqqa da qarsy shyǵyp otyr.
Saılaýda premer jeńiske jetti
Malıde jeksenbi kúni ótken prezıdent saılaýy ekinshi týrynyń qorytyndylary shyǵarylýda. Qazirdiń ózinde eks-premer jáne «Malı úshin birlesý» saıası partııasynyń tóraǵasy Ibragım Býbakar Keıttiń memleket basshysy bolyp saılanǵany belgili bolyp otyr.
Eldegi ahýaldy turaqtandyrý jáne eldiń soltústiginde táýelsiz memleket qurý jolynda kúresip júrgen týaregtermen qarym-qatynasty jolǵa qoıý jańa prezıdenttiń eń basty maqsattarynyń biri bolyp otyr. Aıta ketý kerek, el bıligine týaregterdiń eki birdeı iri birlestikteri – Azaýadty azat etý jolyndaǵy ulttyq qozǵalys jáne Azaýad birligi jónindegi joǵarǵy keńespen beıbit kelisimge kelýdiń sáti túsken bolatyn.
Kosta-Rıkada ańdarǵa «raqymshylyq» jasalmaq
Kosta-Rıka úkimeti zoobaqtardy jaýyp, ondaǵy ańdardy bostandyqqa shyǵaryp jibermek nıette. Biz olardy qutqarýdan basqa jaǵdaılarda ańdardyń torda qamaýly turǵandaryn kórgimiz kelmeıdi, dep túsindirgen eldiń qorshaǵan ortany qorǵaý mınıstri Rene Kastro ańdarǵa «raqymshylyq» jasalý sebebin.
Onyń aıtýynsha, ańdar jabaıy tabıǵatqa qaıtarylady nemese qoryqtar men arnaıy kúzetý ortalyqtaryna jiberiledi. Zoobaqtar aldaǵy jyldyń naýryz aıynan bastap jabyla bastamaq. Osy oraıda Latyn Amerıkasy elderinde sońǵy ýaqyttary janýarlardy qorǵaýshylardyń jergilikti bılikpen kúresiniń kúsheıe túskenin aıta ketý kerek. Buǵan deıin ańdardy jergilikti sırkterde paıdalanýǵa jáne olarǵa ańshylyq jasaýǵa tyıym salynǵan bolatyn.
Nıgerııadaǵy qandy qyrǵyn
Nıgerııada belgisiz bireýler Borno shtatyndaǵy Kondýga qalasynyń meshitinde qandy qyrǵyn uıymdastyryp, 51 adamdy óltirgen. Taǵy 26 adam túrli dene jaraqattarymen aýrýhanalarǵa jetkizilgen.
Sonymen birge, Ngom derevnıasynda 12 adamnyń atyp óltirilgeni de belgili bolyp otyr. Eki shabýyl da ótken jeksenbi kúni Oraza aıt merekesine oraı namaz oqylyp jatqan kezde júzege asyrylǵan. Shabýylǵa Nıgerııa úkimetin qulatyp, eldiń soltústiginde ıslam memleketin qurý úshin qarý kúres júrgizip kele jatqan «Boko Haram» radıkaldy tobynyń sodyrlary kináli degen boljam jasalyp otyr.
Tyńshylyq serverlerdiń mindeti ne?
AQSh-tyń tyńshylyq serverleriniń biriniń Máskeýde ornalasýy múmkin. Ortalyq barlaý basqarmasynyń burynǵy qyzmetkeri Edvard Snoýdenniń brıtandyq Guardian gazetine bergen málimetterinen osyndaı boljam jasaýǵa bolady.
Búginde belgili bolyp otyrǵanyndaı, álemde jappaı tyńshylyq jasaýdyń jahandyq júıesiniń 700 serveri bar. Olar elektrondy hat jazysýlar, júktelgen nemese jiberilgen faıldar, ınternette qaralǵan paraqtar, dostardyń tizimderi men olarmen aradaǵy hat jazysýlar, sondaı-aq uıaly baılanysty paıdalanýshylardyń tel efon kitaptary týraly aqparattar alýǵa jaǵdaı jasaıdy. Bul serverler álemniń 150 elinde, sonyń ishinde Máskeýde, Kıevte, Pekınde ornalasqan, dep habarlaıdy «Vedomostı» gazeti. Gazettiń jazýynsha, tek amerıkalyq elshilik jumys istemeıtin elderde ǵana tyńshylyq serverler joq.
Kúrdter Sırııadaǵy qaqtyǵystarǵa aralaspaq nıette
Irakta kúrdter óńiriniń basshysy Masýd Barzanı Kúrdistan armııasynyń Sırııadaǵy qaqtyǵystarǵa aralasýy múmkin ekenin málimdedi.
Resmı Baǵdadtyń Sırııadaǵy azamat soǵysyna qatysty beıtarap saıasat ustanǵanyna qaramastan, M.Barzanı jıi-jıi ereýilshi ıslamısterdiń nysanasyna aınalyp otyrǵan ózderiniń baýyrlary – sırııalyq kúrdterdiń qaýipsizdigin qamtamasyz etý úshin qolda bar múmkindikterdiń bárin paıdalaný kerek dep esepteıdi. Ásirese, Sırııanyń soltústik-shyǵys aýdandaryndaǵy ahýal aıryqsha alańdaýshylyq týǵyzýda. Buǵan deıin habarlanǵandaı, taıaýda ıslamıster Sırııanyń soltústiginde 450 beıbit kúrdti óltirgen bolatyn. Olardyń 100-den astamy balalar.
Sýdandaǵy sý tasqyny
Sýdannyń Nıl shtatynda bolǵan sý tasqynynan 36 adam qaza taýyp, 5 myńnan astam úı qırady. Bul týraly jergilikti BAQ-tarǵa silteme jasaı otyryp, Bı-bı-sı agenttigi habarlaǵan.
Bul óńirde tamyz aıynyń basynan beri nóser jaýyn toqtamaı tur. Birneshe myńdaǵan adam kóshelerde ómir súrýge májbúr jáne shuǵyl kómek kútýde. Kóptegen sýdandyqtar turatyn saz kirpishten jasalǵan bir qabat úıler sý tasqyny saldarynan op-ońaı shaıylyp ketýde.
Internet materıaldary negizinde ázirlendi.
