Qyzylorda oblysy Jańaqorǵan aýdanynyń Shalqııa kenti mańynan eki aıdan beri iz-túzsiz ketken 48 jastaǵy shopannyń jerge kómilgen máıiti tabyldyi. Bul týraly oblystyq ishki ister departamenti baspasóz qyzmeti habarlady.
Ústimizdegi jylǵy 11 tamyz kúni Jańaqorǵan aýdandyq ishki ister bólimine Shalqııa kentinen 6 shaqyrym qashyqtyqta jerge kómilgen máıit tabylǵany týraly habarlama kelip túsken. Polısııa qyzmetkerleri oqıǵa ornyna jetip, ólgen azamattyń osy aýdannyń 1965 jyly týǵan turǵyny ekenin anyqtaǵan. Ony belgisiz bireýdiń basynan qatty zatpen uryp, óltirgeni de belgili boldy.
Marqumnyń otbasy músheleri bıylǵy jyldyń mamyr aıynda aýdandyq ishki ister bólimine onyń joǵalyp ketkeni jóninde habarlama bergen ekn. Sodan beri ol azamattyń deregi esh jerden shyqpaǵan. Tekserý barysynda bul máıittiń sol azamatqa tán ekeni aıǵaqtaldy.
Polısııa qyzmetkerleri oryn alǵan is boıynsha izdestirý sharasyn júrgizip, osy iske qatysy bar kúdikti azamatty qolǵa túsirdi. Kúdikti azamat osy aýdannyń 1991jyly týǵan turǵyny bolyp shyqty. Ol Ońtústik Qazaqstan oblysy Saıram aýdanyndaǵy egistik alqapta jumys jasap júrgen jerinde ustaldy.
Kúdiktiniń aıtýynsha, jábirlenýshi ekeýi aýdannyń shet aımaǵynda qoı baǵyp, jumys jasaıtyn bolǵan. Kúdikti jábirlenýshiniń járdemshisi bolyp qyzmet atqarǵan. Oqıǵa bolǵan kúni ıaǵnı, mamyr aıynyń 11-inde túngi ýaqytta jábirlenýshi jaılaýǵa iship kelip, kúdikti ekeýi arasynda janjal týǵan. Úı aldynda ekeýi tóbelesip, kúdikti jábirlenýshiniń basynan qatty aǵashpen uryp qalady. Jábirlenýshi oqıǵa ornynda kóz jumǵan soń, kúdikti ony sol mańǵa qazyp, kómip tastaıdy.
Kúdikti kisi óltirgenin eshkimge aıtpaı, qoı baǵyp júre beredi. Jábirlenýshini suraýshylarǵa. «Munda kelgen joq» dep jalǵan aıtady. Oqıǵa bolǵan kúnnen 2 aıdan keıin, kúdikti eshkimge eskertpeı, iz-tússiz ketip qalady.
Qazir kúdikti aýdandyq ishki ister bóliminiń ýaqytsha ustaý abaqtysynda otyr. Onyń ústinen Qylmystyq kodekstiń 96-baby 1-bóligimen qylmystyq is qozǵalyp, tergeý amaldary júrip jatyr. Eger seziktiniń isi tolyq dáleldense, onda oǵan sot sheshimimen 6 jyldan 15 jylǵa deıin bas bostandyǵynan aıyrý jazasy kesilýi múmkin.
Qurysh Nurymbet.
