Úkimet nazaryna
«Qazpochta» AQ basqarma tóraǵasynyń birinshi orynbasary Ermek Pirimbetov dál osylaı degende neni kózdedi?
«Qazpochtanyń» qyzmetine jurtshylyqtyń ókpesi qara qazandaı ekenin oqtyn-oqtyn estip júrmiz. Gazetterdiń keshigip jetkeni óz aldyna, endi turǵyndar sany eki myńǵa jetpeıtin aýyldarda poshta bólimshelerin jaýyp tastaýy renishti odan saıyn údete tústi. Mahambet aýdanyndaǵy Jalǵansaı, Aqtoǵaı aýyldarynda poshta bólimsheleri jabylyp qalǵan.
Úkimet nazaryna
«Qazpochta» AQ basqarma tóraǵasynyń birinshi orynbasary Ermek Pirimbetov dál osylaı degende neni kózdedi?
«Qazpochtanyń» qyzmetine jurtshylyqtyń ókpesi qara qazandaı ekenin oqtyn-oqtyn estip júrmiz. Gazetterdiń keshigip jetkeni óz aldyna, endi turǵyndar sany eki myńǵa jetpeıtin aýyldarda poshta bólimshelerin jaýyp tastaýy renishti odan saıyn údete tústi. Mahambet aýdanyndaǵy Jalǵansaı, Aqtoǵaı aýyldarynda poshta bólimsheleri jabylyp qalǵan. Jalǵansaı selolyq okrýginiń ákimi Qaıyrjan Májıevtiń aıtýynsha, poshta bólimshesi jabylar tusta bul aýylǵa aptasyna eki ret jyljymaly poshta keledi, dep ýáde etilgen. Biraq sol ýáde qumǵa sińgen sýdaı bolypty. Al munda 118 zeınetker, 47 ártúrli toptaǵy múgedek, 30 otbasy zeınetaqy men járdemaqy alady eken. Aı saıyn Jalǵansaıdaǵy zeınetkerler men arnaýly járdemaqy alýshylar úshin 5,5 mıllıon teńgege jýyq qarjy jetkiziledi. Ony ne kúzeti, ne arnaýly kóligi joq poshtashy jalǵyz ózi taksı jaldap ákeledi! Mol aqshany taratatyn arnaýly orny da, taratylmaı qalǵan aqshany saqtaıtyn seıfi de joq. Sol sebepten, zeınetaqy men arnaýly járdemaqyǵa beriletin aqsha okrýg ákiminiń qyzmet bólmesinde taratylady eken.
Aqtoǵaı aýylynda da dál osyndaı jaǵdaı qalyptasyp otyr. Bul eldi mekenge de aı saıyn 4,5 mıllıon teńge Jalǵansaıdaǵydaı jolmen jetkiziledi. Betin ármen qylsyn, kúni keshegi Aqmola oblysyndaǵy oryn alǵan jaǵdaı sekildi birneshe mıllıon teńgeni jalǵyz-jarym tasymaldaıtyn adamdarǵa qaraqshylar qarý kezenip, ózin jazym etip, mol qarjyny qoldy qylsa she? Mundaı jaǵdaı oryn alsa, oǵan kim kináli bolady? «Qazpochta» basshylyǵy kemshilikti óz moınyna ala ma? Álde bar kináni ári kúzetsiz, ári arnaýly kóliksiz jetkizýshiniń moınyna arta sala ma?
Muny «Qazpochtanyń» basshylyǵy bilse de, kózjumbaılyqqa salynyp otyr. «Bul qylmysqa jol ashý emes pe?» dep shyryldaıdy Jalǵansaı selolyq okrýginiń ákimi Q.Májıev. Poshta bólimshesiniń jabylyp qalǵanyna nalyǵan Jalǵansaı aýylynyń turǵyndary Parlament Senatynyń depýtaty Sársenbaı Eńsegenovke shaǵym aıtypty. Osy máseleniń túp-tórkinin ózderi aıtsyn dep sheshken senator S. Eńsegenov «Qazpochta» AQ basqarma tóraǵasynyń birinshi orynbasary Ermek Pirimbetovti qolynan jetelep, Mahambet aýdanyna alyp keldi. Onymen kezdesý úshin osy aýdan ortalyǵyna ózge aýdandar ákimderiniń orynbasarlary, máslıhat hatshylary jınaldy.
Alaıda, olar «Qazpochtanyń» tizginin ustaǵan basshynyń biri E.Pirimbetovten kóńil kónshiter sóz estigen joq. Qalyń qazaqtyń ortasyna kelse de orys tilinde saıraǵan ol «Qazpochtanyń» únemi shyǵynmen jumys isteıtinine kóńil aýdardy. Sonyń ishinde Mahambet aýdandyq poshta baılanysy toraby bıylǵy birinshi jarty jyldyqty shyǵynmen aıaqtapty. Buǵan sirá, eki jyldan beri osy poshta torabyn basqarýǵa basshynyń taǵaıyndalmaǵany da áser etken sekildi. E.Pirimbetovtiń pikirinshe, «Qazpochtanyń» shyǵynmen jumys isteýine baspasóz taralymynyń ósýi de yqpalyn tıgizetin sekildi.
– «Egemen Qazaqstan» men «Kazahstanskaıa pravda» gazetteri aptasyna bes ret shyǵady. Osy gazetterdi kún saıyn bes ret suryptaý, jetkizý qajet. Bul –bizge múmkin emes, – dep shirendi E.Pirimbetov.
Gazetterdiń oqyrman qolyna kóp keshigip jetetinine mysal óte kóp. Mahambet aýdandyq máslıhatynyń hatshysy Asqar Qurmanbaev «Egemen Qazaqstannyń» seısenbi kúni (13 tamyz) shyqqan nómiriniń kelesi kúni tús aýǵanǵa deıin aýdandyq ákimdikke kelmegenin tilge tıek etti. Aýdandyq ákimdikke jetpegen gazet oqyrman qolyna ýaqytynda jetedi degenge kim senedi?
Al Qurmanǵazy aýdandyq máslıhatynyń hatshysy Rıfhat Sultanııaev: «Gazetter keı aýyldarǵa on-on bes kúndeı keshigip jetedi. Osynsha ýaqyt ótkennen keıin basylymnyń aqparattyq mańyzy bar ma?» dep saýaldy tótesinen qoıdy.
Osyǵan oraı «Qazpochta» AQ basqarma tóraǵasynyń birinshi orynbasary E.Pirimbetov: «Gazetterge jazdyrýdy qoıyńyzdar!» dep tóbeden jaı túsirgendeı dúńk etkizdi. Sonda bul basshy neni kózdep otyr? Osydan keıin «Qazpochta» basshylyǵynyń poshta bólimshelerin jabýmen shektelmeı, gazet taratýdy da artyq júk sanap otyrǵany ańǵarylmaı ma? Aıtqandaı, aldaǵy ýaqytta bul mekemeniń Atyraý oblysynan 17 poshta bólimshesin jabý jospary bar ekeni belgili bolyp qaldy. Sonyń ishinde Reseımen shekaralas aýyldar da bar. Sonda «Qazpochta» basshylyǵyn shekarada otyrǵan turǵyndardyń el tynysynan, memleket saıasatynyń barysynan shet qalatyny oılandyrmaıtyn bolǵany ǵoı!
– Memleket aýyldarǵa jańa mektepter men balabaqshalar salyp jatyr. Taza aýyz sý jelisin tartyp, turǵyndardyń turmysyn jaqsartý saıasatyn ustanyp otyr. Alaıda, turǵyny eki myńǵa jetpeıtin aýyldarda poshta bólimsheleriniń jabylatyny qalaı? Bul másele Úkimet deńgeıinde oń sheshimin tabýy tıis, – deıdi Senat depýtaty S.Eńsegenov.
Qalaı degende de «Qazpochta» basshylyǵy tarapynan jaýapsyzdyq baıqalyp-aq tur. «Qyzmeti halyqtyń kóńilinen shyqpaıtyn osyndaı qurylymnyń ózi bizge kerek pe?» deıdi el. Durys saýal. Shyǵynmen jumys istep kele jatqandaryn syltaý etip, máseleni sheshýden taısaqtaı berse, sonda bul mekeme ne isteıdi, qandaı jumys atqarady?
Gazetter taralymy, ásirese memlekettiń úni bolyp otyrǵan basylymdardyń taralymy – memlekettik máni bar másele. Ony eskermeý – sholaqtyq. Álde endi «Qazpochta» tasyp úlgerýi úshin «Egemen Qazaqstandy» aptasyna 2 ne 3 ret qana shyǵarsaq pa eken?!
Joldasbek ShО́PEǴUL,
«Egemen Qazaqstan».
Atyraý oblysy.
