Ásirese, jazǵy maýsymda jurt jappaı aǵylatyn teńiz jaǵalaýlary endi burynǵydaı demalýshylar jınaı almaıtyny belgili. Koronavırýs qateri baıaýlaǵanmen de kóptegen el budan bylaı týrızmniń ishki múmkindigine ǵana úmit artatyny aıqyndalyp keledi. Al bul jaǵdaı Qazaqstandaǵy ishki týrızmdi damytýdyń jańa múmkindikterine jol ashýǵa tıis. О́ıtkeni juqpaly indettiń aldyn alý sharalaryn qatań saqtaı otyryp, otandyq demalys oryndarynyń jumysyn jandandyrýǵa basa kóńil bólinip otyr. Qazir osy baǵyttaǵy jumys Alakól jaǵalaýynda qyzý qolǵa alynǵan. Jalpy, 15 maýsymnan bastap Almaty oblysy aýmaǵyndaǵy jaǵajaı týrızmi bıylǵy jumysyn bastady. Birinshi kezekte Alakól jaǵalaýyndaǵy demalys oryndary ashyldy.
– Alakóldegi demalys oryndaryn 15 maýsymnan bastap ashýǵa ruqsat berdik. Bıyl kóldiń qos jaǵalaýyndaǵy shomylý maýsymyn bir mezette ashý úshin Shyǵys Qazaqstan oblysynyń ákimdigimen kelistik. Jaǵajaıda juqpaly indettiń aldyn alý sharalary qatań saqtalatyn bolady. Jalpy, demalys oryndaryndaǵy sanıtarlyq-epıdemııalyq talaptar burynnan qatań qadaǵalanyp keledi. Al pandemııa jaǵdaıynda baqylaý tipten kúsheıgeni durys. Adamdar demalys kezindegi saqtyq sharasyn saqtaýdy úırenýi kerek. Biz óz tarapymyzdan barlyq qajetti sharany jasaımyz, – deıdi Almaty oblysynyń ákimi Amandyq Batalov.
Jalpy, oblystyń týrızm basqarmasynyń mamandary bıyl Alakól jaǵalaýynda demalýshylar qatary jyldaǵydan eselep kóbeıedi degen boljam jasap otyr. Onyń bir sebebin shetel kýrorttary men jaǵajaılaryndaǵy shekteýlerdiń kúsheıip, áýe qatynasynyń kúrdelenýinen izdegen durys. Demek, demalys maýsymyn sýy shıpaly Alakól jaǵalaýynda ótkizýshiler leginiń ósetini anyq. Ári bul otandyq ekonomıka úshin úlken olja bolary sózsiz. Al Alakól jaǵalaýyndaǵy demalys oryndarynyń ahýaly qandaı? Derek boıynsha mundaǵy 144 demalys nysany kelýshilerdi qabyldaýǵa tolyqtaı daıyn. Bul oryndar bir mezette 4500 adamǵa qyzmet kórsete alady. Munan bólek, Alakól jaǵalaýynda buǵan deıin 250 ornalasý nysany jumys istep turǵan bolsa, bıyl taǵy 14 jańa nysan ashylady. Sondaı-aq jaǵajaıda qaltaly qonaqtarǵa arnalǵan joǵary deńgeı̆li qonaqúı̆ler de jetkilikti. Sáıkesinshe, bıyl Alakól jaǵalaýyndaǵy bir kúndik demalys quny 5 myń teńge men 150 myń myń teńgeniń arasynda bolmaq.
Alakól jaǵalaýyna kelýshiler úshin «Nur-Sultan – Úsharal – Nur-Sultan» jáne «Almaty – Úsharal – Almaty» baǵyttary boıynsha áýe reısteri jumys istep tur. 1 maýsymnan bastap ashylǵan ushaq sapary kún saıyn qatynaıdy. Al 8 maýsymnan 24 qazanǵa deıin «Almaty – Úsharal – Almaty» baǵyty boıynsha qosymsha reıs iske qosylady. Sondaı-aq «Jetisý» avıakompanııasy «Taldyqorǵan – Úsharal – Taldyqorǵan» baǵyty boıynsha aptasyna 7 ret adam tasymaldap otyr. Munan bólek, Alakólge qaraı temirjol qatynasy da júrýdi bastady. Qazir «Jetigen – Dostyq – Jetigen» baǵyty boıynsha poıyz qatynaıdy. Bılet baǵasyn áleýmettiń qaltasy kóteredi. Shyǵynnyń bir bóligin oblys bıýdjeti sýbsıdııalaıdy eken. Osy maqsatqa 85 mln teńge qarjy qarastyryldy. Iаǵnı «Jetigen – Dostyq – Jetigen» baǵyty boıynsha poıyz qatynasy maýsym aıynan bastap, tamyz aıyna deıin aptasyna 3 ret júredi. Arnaıy 7 vagon bar. Bılet baǵasy plaskart orny úshin – 2686 teńge, kýpe – 4500 teńge. Poıyzdaǵy oryn sany 324 jolaýshyǵa arnalǵan.
– Biz bıylǵy demalys maýsymynda Alakól jaǵalaýyna kelýshiler qatary 2 mln adamnan asady degen boljam jasap otyrmyz. Týrısterge oblys tarapynan barlyq jaǵdaı jasalýda. Jol, demalys nysandarynyń qurylysy júrip jatyr. Demalystyń jaıly bolýy, qaýipsizdiktiń saqtalýy úshin qajetti sharalar jasalady. Ásirese demalýshylardy qarsy alatyn Aqshı aýylyndaǵy týrıstik nysandardy damytýǵa kóńil bólinýde. Munda qazir úlken demalys saıabaǵynyń qurylysy júrip jatyr. Nysandy 6 shildege deıin aıaqtap, paıdalanýǵa bermek. Saıabaq aýmaǵynda avtokólik turaǵy, oıyn alańdary, jazǵy dámhana, 336 adamǵa arnalǵan amfıteatr, ashyq sahna, fýtbol alańy, voleıbol alańy, velojoldar, rolıkpen syrǵanaýǵa arnalǵan alań jáne basqa da sportpen aınalysýǵa qolaıly oryndar bar, – deıdi oblystyq týrızm basqarmasynyń týrıstik jobalardy josparlaý jáne júzege asyrý bóliminiń basshysy Baqytjan Orazbaev.
