Shymkent qalasyndaǵy fızıka-matematıka baǵytyndaǵy Nazarbaev Zııatkerlik mektebiniń 10-synyp oqýshylary Bórte Qurbanbaı, Jibek Álıaqbar, Almıra Ábdiqadyr jáne Aıda Malıkova «U:hack» ıdeıalar festıvaline qatysyp, sonyń aıasynda 24 saǵattyń ishinde mektep jasyna deıingi jáne mektep oqýshylaryna qazaq tilin úıretetin onlaın-medıatekany jasap shyǵardy. Olar ázirlegen «Ynta» jobasynyń maqsaty − qazaq tilindegi medıa-faıldar, kitaptar men fılmder arqyly mektepke deıingi jáne mektep jasyndaǵy balalarǵa qazaq tilin úırenýge qyzyqtyrý.
Platformanyń negizin qalaýshylardyń biri B.Qurbanbaıdyń aıtýynsha, jobanyń ıdeıasy − fılmdi nemese serıaldyń epızodyn qaraý kezinde nemese podkasty, ıa aýdıokitapty tyńdaý barysynda mátindegi beımálim sózdi belgilep, sol sózdiń maǵynasyn, orys jáne aǵylshyn tilindegi aýdarmasyn, sınonımderin jáne sóılemde qoldaný mysalyn tabý arqyly qazaq tilin úırený, leksıkalyq jáne grammatıkalyq qoldanysyn keńeıtý. Bul úshin saıtta beımálim sózdiń maǵynasyn kórsetý jáne sózdikti toltyrý fýnksııalary qamtylǵan.
Sondaı-aq qazaq tilindegi kontenttiń jetispeýshiligi, qazaq tilinde aýdarylǵan álemdik ádebıet pen álemge áıgili fılmderdiń shekteýli tizimi máselesi de qyzdardyń jobasynda kórinis tapty. Bul maqsatta qyzdar áýesqoı jáne kásibı aýdarma, sondaı-aq dybystaý mamandarymen yntymaqtastyq ornatýdy usynǵan.
«Bizdiń joba – ári tanymdyq, ári qyzyq kontenttiń sımbıozy. О́z betimen til úırenýdiń qanshalyqty qıyn ekenin bárimiz bilemiz. Sondyqtan til úırenýde jaqsy nátıjelerge qol jetkizý úshin ózińe qyzyqty nárselerdi qaraǵan jón», dep atap ótti A.Ábdiqadyr.
«U:hack» – ınnovasııalyq ıdeıalardy iske asyrýǵa arnalǵan ıdeıalar alańy. Festıval aıasynda komandalar 24 saǵat ishinde uıymdastyrýshylar bergen tapsyrmalardyń ońtaıly sheshimin taýyp, ony jan-jaqty oılastyryp, óz jobasyn usynady.
