UQK Shekara akademııasynyń baspasóz hatshysy Janat Jabyrbekovtiń aıtýynsha, kýrsanttar bıyl aqpan aıynyń sońynda ótken ashyq týrnırde sheberlik dárejesin taǵaıyndaý talaptaryn oıdaǵydaı oryndaǵan. Biraq elimizde indet taralyp, karantın rejimine baılanysty atalǵan is-sharanyń qorytyndysy keıinge shegerilgen.
MMA Federasııasynyń jumys josparyna sáıkes 22-23 aqpan aralyǵynda Almaty qalasyndaǵy «Medına» sport kesheniniń bazasynda «Arashı-Karate-Mıks-Kombat» aralas jekpe-jekten respýblıkalyq ashyq týrnır ótken. Baıraqty básekege 27 sport klýbynan ár salmaq dárejesi boıynsha 350-den asa jekpe-jek óneriniń qyrandary qatysqan bolatyn. Jarys qorytyndysy boıynsha UQK Shekara akademııasynyń kýrsanttary júldeli oryndarǵa ıe boldy. Sondaı-aq sporttyń «Arashı-Karate» túrinen «Sport sheberi» ataǵyn ıelendi. Olar – Shákárim Áben, Arhat Aısanov, Nurbek Manazarov, Erasyl Mýkashev, Bekzat Nurǵazınov, Davlet Qanatbekov. Buǵan qosa birqatar kýrsantqa «Sport sheberine úmitker» ataǵy berildi.
Sonymen qatar qoıan-qoltyq urystan elimizdiń eńbek sińirgen sport sheberi, QR UQK Shekara akademııasy arnaıy-taktıkalyq fakýlteti dene shynyqtyrý daıyndyǵy kafedrasynyń oqytýshysy kapıtan Berik Shynalıevke joǵary dárejeli sportshylardy daıyndaǵany jáne sportty damytqany úshin «Arashı-Karate» jattyqtyrýshysy ataǵy berildi.
Jaqynda jarysqa qatysqan joǵarydaǵy shekarashy kýrsanttarǵa «Sport sheberi» jáne «Sport sheberine úmitker» ataǵyn aıqyndaıtyn arnaıy kýálik daıyndalyp, oqý ornynyń mekenjaıyna joldanǵan eken. Osyǵan oraı UQK Shekara akademııasynda UQK tóraǵasynyń orynbasary general-maıor Marat Qalqabaevtyń qatysýymen saltanatty is-shara uıymdastyryldy. Shara barysynda shekarashy sportshylar «Sport sheberine úmitker» kýáligin aldy.
