Memlekettik kirister komıtetiniń baspasóz qyzmetiniń ókili Aınur Sartaevanyń aıtýynsha, buryn, 2021 jyldyń 1 qańtaryna deıin, Qazaqstan Respýblıkasynyń «Sybaılas jemqorlyqqa qarsy is-qımyl týraly» zańyna sáıkes (11-baptyń 3-tarmaǵy) memlekettik qyzmetten teris sebeptermen bosatylǵan adamdar jumystan shyǵarylǵannan keıin úsh jyl ishinde turǵylyqty jeri boıynsha memlekettik kirister organyna kirister men múlik týraly deklarasııany tapsyrýǵa mindetti bolatyn (esep nysany 230.00).
Endi jalpyǵa birdeı deklarasııanyń engizilýine baılanysty 2021 jyldyń 1 qańtarynan bastap memlekettik qyzmetten teris sebeptermen bosatylǵan adamdar úshin 230.00 nysany boıynsha kirister men múlik týraly deklarasııany tapsyrý toqtatylady.
2020 jyly múliktik tabysty, Qazaqstan Respýblıkasynan tys jerlerdegi kózderden tabysty jáne Salyq kodeksiniń 363-babynda kózdelgen ózge de kiristerdi alǵan jaǵdaıda atalǵan tulǵalar ornalasqan (turǵylyqty) jeri boıynsha salyq organyna jeke tabys salyǵy boıynsha deklarasııany (240.00-nysan) tabys etetinin eskerý qajet. Bul deklarasııany tapsyrý merzimi – 2021 jylǵy 31 naýryz.
Eger jeke tulǵa qatelesip, 2020 jylǵa arnalǵan 230.00-nysandaǵy deklarasııany tapsyrsa, onda mundaı deklarasııa keri qaıtarylyp alýy tıis.
Eske sala keteıik, aǵymdaǵy jyl elimizde jalpyǵa birdeı deklarasııalaýdy engizýdiń birinshi kezeńiniń basy bolady.
Salyq kodeksinde jalpyǵa birdeı deklarasııalaýdy tórt kezeńmen júzege asyrý qarastyrylǵan. Birinshi kezeńde (2021 jylǵy 1 qańtardan bastap): jaýapty memlekettik laýazymdy atqaratyn adamdar men olardyń jubaılary (zaıyptary); memlekettik fýnksııalardy oryndaýǵa ýákilettik berilgen jáne olarǵa teńestirilgen adamdar, sondaı-aq olardyń jubaılary (zaıyptary); «Qazaqstan Respýblıkasyndaǵy saılaý týraly Qazaqstan Respýblıkasynyń Konstıtýsııalyq zańyna jáne «Sybaılas jemqorlyqqa qarsy is-qımyl týraly», «Qazaqstan Respýblıkasyndaǵy bankter jáne bank qyzmeti týraly», «Saqtandyrý qyzmeti týraly», «Baǵaly qaǵazdar rynogy týraly» Qazaqstan Respýblıkasynyń zańyna sáıkes tabys etý mindeti júktelgen adamdar deklarasııa tapsyrýǵa mindetti.
