Jyl basynda mektepter shekteýli adam sanymen jumys isteıtini habarlanǵan edi. Alaıda Fransııa úkimeti sáýirde mektepterdi qaıta jabýǵa sheshim qabyldady. Senbide úkimet basshysy barlyq mektep pen saýda oryndary, sonymen qatar dúkender jumysyn toqtatatynyn málimdedi. Úıden sebepsiz on shaqyrymǵa alystaýǵa bolmaıdy. Osylaısha, fransýzdar qasıetti Pashany úılerinde atap ótti.
El prezıdenti Emmanýel Makron ınfeksııalyq aýrýhanalar sany áli de artatynyn habarlady. Sońǵy statıstıkaǵa zer salsaq, Fransııanyń 46 677 azamaty vırýs juqtyryp, 304 adam qaıtys bolǵan. Prezıdent qatań karantın jarııalaýǵa májbúrlik týyndamas degen senimin de jasyrmady.
Germanııa prezıdenti Shteınmaıer halyqty vaksına ektirýge shaqyrdy. Senbi kúni halyqqa arnaǵan joldaýynda úshinshi tolqynda shekteýler qatańdatylýy múmkin ekenin eskertti. Eń mańyzdysy – ol eldegi senim deńgeıine qatysty óz oıyn bildirdi. «Iá, synama kezinde qatelikter ketýi múmkin. Degenmen, pandemııadan qutylý áp-sátte emes. Sondyqtan da saıası dıskýssııanyń sebebi bar. Alaıda qur talqylaýlar esh nátıje bermeıdi. Ol qaı deńgeıde – jergilikti ne memlekettik, partııalyq ne koalısııalyq deńgeıde bolsyn, negizgi, sheshýshi faktor emestigin eskerý kerek. Biz halyqqa baǵyt berip, pragmatıkalyq sheshim usynýymyz kerek», dedi memleket basshysy.
Kansler Merkel sáýirdiń basynda merekege oraı karantın jarııalanady degenimen, resmı habar bolmady.
Úshinshi tolqyndy karantınmen bastaǵan taǵy bir Eýropa eli – Italııa. Memleket tutastaı «qyzyl aımaqta». Densaýlyq saqtaý uıymdary kúnine 20 myńnan astam adamnan vırýs tabylatynyn málimdedi.
Rım papasy Fransısk bıylǵy Pasha merekesimen quttyqtaýyn bos shirkeýden joldady. Jyl saıyn júz myńdaǵan halyq jınalatyn Áýlıe Petr shirkeýi osy jyly tek 200 adam ǵana qabyldaýǵa ruqsat aldy. Shirkeýdegi merekelik qyzmet onlaın translıasııa arqyly kórsetildi. Rım papasy joldaýynda karantın talaptaryn saqtap, memleket basshylaryn indetke qarsy vaksına saıasatyn jolǵa qoıyp, retteýin surady. Bıylǵy quttyqtaýda saıası másele de shet qalmady. Rım papasy mynadaı eleń-alań kezde áskerı qarý-jaraq pen shıelenisterge aqsha jumsaýdyń qısynsyz ekenin atap ótti. Odan keıin jeksenbide jyl saıynǵy dástúrli joldaýynda álemdegi daǵdarystyń órship jatqanyn aıta kele, densaýlyqqa beı-jaı qaramaý keregin eske saldy.
Eýropadaǵy jaǵdaıdy DSU synǵa aldy. Halyqaralyq uıym Eýropa vaksına máselesine nemquraıdy qarap, jaǵdaıdy ýshyqtyryp aldy degen kiná taǵady. DSU-nyń Eýropa boıynsha dırektory Hans Klıýg «Bul pandemııadan qutqarar jalǵyz jol – vaksına. Degenmen, vaksınalaý qarqyny tym tómen. Úkimetter buǵan jaýapkershilikpen qarap, azamattarǵa onyń mańyzyn túsindirýi kerek. Bizdiń qolymyzdaǵy statıstıkaǵa qarasaq, aýmaqtaǵy 900 mln adamnyń tek 10 paıyzy ǵana vaksınanyń alǵashqy dozasyn saldyrǵan», dedi.
Al AQSh keshe 4 mln-nan astam azamatynyń vaksına saldyrǵanyn habarlady. Osylaısha, vaksına saldyrý deregi boıynsha rekord jańartylǵan. Bul týraly Aqúıdiń Covid-19 aqparatyna jaýapty doktor Saırýs Shafar áleýmettik jelide jazdy. AQSh úkimeti buǵan deıin kúnine 3 mln adamǵa vaksına salyp kelgen. «Eger adamdar maska taǵyp, birneshe adam bolyp jınalýdy doǵarsa, sonymen qatar vaksına salýdy mindetti shara dep qabyldasa, AQSh bul pandemııadan tezirek qutylady», dedi prezıdent Baıdenniń pandemııa boıynsha keńesshisi doktor Entonı Faýchı.
