Onyń aıtýynsha, munaıǵa jáne munaı ónimderine baǵanyń ósýi osy kórsetkishke oń yqpalyn tıgizdi. Aıtalyq, esepti kezeńde Brent markaly munaıdyń ortasha baǵasy barreline 65 dollar deńgeıinde qalyptasty. Byltyrǵymen salystyrsaq bul 62,2%-ǵa joǵary bolyp otyr.
Sonymen qatar qańtar-maýsym aılarynda kompanııa 291 mlrd teńge kóleminde oń bos aqsha qarajatyn jınaqtady. Taza paıda 644 mlrd teńgeni qurady. Al EBITDA kórsetkishi 1,1 trln teńgeni qurady, bul ótken jyldyń kórsetkishinen 92,6%-ǵa joǵary.
– EBITDA, taza paıda, bos aqsha aǵyny kórsetkishteri 2020 jyldyń birinshi jartyjyldyǵymen, sondaı-aq 2019 jylǵy pandemııaǵa deıingi uqsas kezeńmen salystyrǵanda anaǵurlym jaqsy deńgeıde qalyptasty. Bul 2020 jyly daǵdarysqa qarsy baǵdarlamanyń iske asyrylýymen jáne operasııalyq, kúrdeli shyǵyndardyń qysqarýymen baılanysty, – dedi D.Qarabaev.
Onyń málimetinshe, 2021 jyldyń birinshi jartyjyldyǵynda shoǵyrlanǵan jalpy jáne ákimshilik shyǵystar 2020 jyldyń osyndaı kezeńine qaraǵanda 8%-ǵa jáne 2019 jyldyń birinshi jartyjyldyqtaǵy kórsetkishten 26%-ǵa tómen deńgeıde qalyptasty. Bul rette, absolıýtti jáne salystyrmaly túrde eń kóp qysqarǵan kúrdeli shyǵyndar boldy.
– Esepti kezeńde «QazMunaıGaz» birlesken kásiporyndardy sanamaǵanda, el qazynasyna salyq túrinde 300 mlrd teńgeden astam qarajat tóledi. Budan bólek kompanııa óz aksıonerlerine 50 mlrd teńge somasyna dıvıdend tóledi, – dep atap ótti QMG Basqarma tóraǵasynyń orynbasary.
D.Qarabaev «QazMunaıGaz» ulttyq kompanııasy óndiristik jáne qarjylyq kórsetkishterdi «pandemııaǵa deıingi» deńgeıge jetkizý boıynsha jumysyn jalǵastyryp jatqandyǵyn alǵa tartty.
– О́ndiristik nátıjelerimiz «daǵdarysqa deıingi» kórsetkishterden áli tómen bolsa da, qazirdiń ózinde kompanııanyń qarjylyq ahýaly edáýir jaqsarǵanyn kórýge bolady. Onyń keıbiri 2019 jylǵa qaraǵanda ósip keledi. Degenmen, bizge bosańsýǵa bolmaıdy. Kompanııa óziniń qyzmetin shyǵyndardy barynsha qysqarta otyryp jalǵastyrady, – dep qorytyndylady D.Qarabaev.
