Asyl tuqymdy «Taımas» sortyn ortalyq ǵalymdary 15 jyl boıy zerttegen. Bıyl memlekettik patent aldy. Bul týraly ortalyqtyń Jazdyq jumsaq bıdaı seleksııasy zerthanasynyń meńgerýshisi, jas ǵalym Eljas Qaıyrjanov aıtty.
Mamandar jańa sorttyń qurǵaqshylyqqa tózimdi ekenin aıtty. «Taımas» pisý túrine sáıkes orta maýsymdyq sortqa jatady. Astyq sapasynyń tehnologııalyq kórsetkishi boıynsha da sorty joǵary bıdaı sanalady.
– Mundaǵy shıki qamyrlylyǵynyń mólsheri – 32,3-34,5 paıyz, aqýyz – 15,1-15,7 paıyz. Sorttyń ónimdiligi de asa joǵary. Zertteý jyldarynda jańa sort maksımaldy ónimdilik kórsetti – 38,5 s/ga. Jańa ónim Soltústik Qazaqstan jaǵdaıynda ósirýge usynylady, – dedi E.Qaıyrjanov.
Elimizdiń soltústik óńirlerine asa beıindi jańa sort alqaptarda kezdesetin túrli aýrýlarǵa tózimdi. Tipti sary tot aýrýyn da elemeıdi. Atalǵan aýrý túri bıdaıdyń ósýi men jetilýine aıtarlyqtaı zııan keltiredi. Oǵan shaldyqqan bıdaı 30-40 paıyz ónimdiligin joǵaltady. Al «Taımas» sorty buǵan tózimdi.
E.Qaıyrjanovtyń aıtýynsha, qazir elıtalyq tuqym túrin kóbeıtý jumystaryna daıyndyq júrgizilip jatyr. Aldaǵy eki jyl ishinde ony jetkilikti mólsherde kóbeıtip, tuqym retinde ózge tuqym sharýashylyǵymen aınalysatyn sharýa qojalyqtaryna jóneltý josparlanyp otyr.
Berdibek HABAI,
S.Seıfýllın atyndaǵy Qazaq agrotehnıkalyq ýnıversıteti
