Astanada «Ekonomıkanyń sıfrlyq transformasııasy» taqyrybynda ótken Sheteldik ınvestorlar keńesi barysynda Sıfrlyq damý, ınnovasııalar jáne aeroǵarysh ónerkásibi mınıstrligi otandyq IT-kompanııalardyń kórmesin uıymdastyrdy.
– Sıfrlyq hab retinde bizdiń óńirge degen qyzyǵýshylyq kún saıyn artyp keledi. Birneshe jyldan beri halyqaralyq naryqqa shyqqan otandyq startaptar básekelestik ortada qarqyndy damyp jatyr. Sheteldik ınvestorlardyń nazaryna usynylǵan IT-kompanııalardyń da eksporttyq áleýeti joǵary, – deıdi Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın.
Is-sharada jergilikti IT-kompanııalar men memlekettik organdardyń 49 ınnovasııalyq sheshimi usynyldy.
– «Astana Hub» segiz IT-startapty usyndy. Olar – jasandy ıntellekt, EdTech, kıberqaýipsizdik, bıznes-úderisterdi ońtaılandyrý/avtomattandyrý salasyndaǵy keleshegi zor jobalar. Keıbiri halyqaralyq naryqqa shyǵyp ta úlgerdi, – deıdi «Astana Hub» basqarýshy dırektory Alına Ábdirahmanova.
Onyń aıtýynsha, elimizdiń startap ındýstrııasy ókilderiniń Sheteldik ınvestorlar keńesiniń múshelerimen kezdesýi jahandyq kompanııalarmen seriktestik jáne yntymaqtastyq ornatyp, otandyq ekojúıeni damytýǵa berilgen úlken múmkindik.
– Bizdiń startap munaı ken oryndaryn ıgerý boıynsha veb-sımýlıator munaı barlaý koeffısıentin tıimdi basqarýǵa ári ulǵaıtýǵa, ken ornyn ıgerý shyǵyndaryn 40 paıyzǵa deıin qysqartyp, kúndelikti óndirýdi 70 paıyzǵa arttyrýǵa múmkindik beredi. Maqsatymyz – salany túsinetin smart ınvestorlar tabý jáne 1,3 mıllıon dollar kóleminde ınvestısııa tartý, – deıdi «Neuron Oil»-dyń negizin qalaýshy Asylan Jumaǵalıev.
Aıta ketsek, mashınalyq oqytýy bar kross-sandyq modeldeýdiń jańa tásilderiniń mundaı úılesimin búkil álem boıynsha shamamen 3-4 jas kompanııa ǵana júrgizedi. Sonyń ishinde AQSh-ta (Kremnıı alqabynda), Fransııada, BAÁ-de bar. TMD elderi arasynda «Neuron Oil» jańa tásilder men óte joǵary praktıkalyq nátıjelerdi qoldaný boıynsha kóshbasshy sanalady.
