Qaladaǵy irili-usaqty mádenı-kópshilik is-sharalardy júrgizip júretin Qanatty birde fabrıka basshylyǵy ózderinde ótetin sondaı bir sharýany atqaryp berýge shaqyrdy. Bardy, atqardy. Sol joly ony óndiristegi ómir qatty qyzyqtyrdy. «Osynda jumysqa turýǵa bola ma?», dedi. «Mamandyǵyń kele qoımaıdy ǵoı» degen sózge óz ýájin aıtty. «Maǵan senseńizder, kez kelgen mamandyqtyń birin tez-aq úırenip, ıgerip ketemin» degen soń, ynta-yqylasyn, talabyn baıqaǵan basshylyq betinen qaqpady. Sóıtip, óndiristegi ómiri bastaldy.
– Bizdiń mindetimiz – eńbek qaýipsizdigin saqtaı otyryp, sehtaǵy shań-tozańnyń aldyn alý, ıaǵnı jumyskerlerdiń aýasy taza jerde jumys isteýin qamtamasyz etý. Jumys orny eńbek etýge qolaıly bolmasa, jumyskerdiń de tirligi mańdyp jarytpaıdy. Sol turǵyda biz olardyń tabysty eńbeginiń negizin qalaımyz desek te bolady, – deıdi Qanat óz jumysy týraly.
О́ndiriste de óner deıtin ómir bar. Jezqazǵan ken óndirisinde óner adamdary az bolmaǵan. Aqıyq aqyn, memleket jáne qoǵam qaıratkeri Kákimbek Salyqov, dańǵaıyr jyraý, aqyn Shynbolat Dildebaev, kenish dırektory bolyp júrse de, qalamy qolynan túspegen Sadyq Asatov... Bul tizimdi odan ári de soza berýge bolady.
Q.Mýsınniń esinen sol aǵalary eshqashan shyqpaıdy. О́ndiriste júrip ónerdiń otyn jaqqan aǵalary tárizdi bolǵysy keledi, soǵan umtylady. О́ziniń aıtýyna sensek, 5 jasynan bastap óleń jazǵan eken. Jergilikti jas sazger Muhamed-Ázız Musabekov ekeýiniń shyǵarmashylyq baılanysynan shyqqan «Baıytýshylar gımni» qazir fabrıkanyń kez kelgen is-sharalarynda saltanatpen oryndalyp jatady. Myńdaǵan júrekterdiń tórinen oryn alǵan uran-ánniń sózin jazǵanyn oryndy túrde maqtanysh etedi.
Qanat fabrıkadaǵy qoǵamdyq jumystarǵa belsendi túrde atsalysady. 2022 jyly «Qazaqmys korporasııasy» JShS jumysshylarynyń arasynda «Jastar Bolashaq» jastar odaǵy «О́ndiris sultany-2022» baıqaýyn uıymdastyrdy. Bul baıqaýǵa korporasııanyń respýblıkadaǵy barlyq qurylymdarynan 24 jigit qatysty. Qanat baıqaýda uly Abaıdyń obrazyn somdap, dananyń qara sózin mánerine keltire oqydy. Budan bólek, ózi túsirgen jumys ornynda eńbek qaýipsizdigin saqtaý jónindegi beınerolıgi de joǵary baǵalandy. Sóıtip, baıqaý jeńimpazy atandy. Ol ártúrli deńgeıdegi aqyndar músháırasyna da jıi qatysyp, árqashan júldegerler qatarynan tabylady. Ulytaý oblysy aqyndary arasynda Táýelsizdik merekesine arnalǵan músháıranyń bas júldesin de ıelendi. О́leńderi jas aqyndardyń respýblıkalyq jyr jınaǵyna endi. Qalalyq, oblystyq, respýblıkalyq basylymdarda jyr-tolǵaýlary jıi jarııalanyp turady.
Qanat mamandyq qana emes, jar tańdaýda da qatelespegen azamat. Onyń nazary túsken, júregi qalaǵan arý qyz Indıra munyń bosaǵasynan attaǵanda nebári 16 jasta bolatyn. Jas jubaılar tuńǵyshtarynyń tusaýkeserin ótkergen soń ǵana Neke saraıyna bardy. Sol Indıra qazir Álǵazız, Janaıdar, Haqnazar, Álhafız esimdi tórt batyrdyń anasy. Bularǵa qosa eki atasyn, eki enesin baǵyp-qaǵyp otyr. Qanatty jumysqa kúlip shyǵaryp salyp, kelgende naq solaı qarsy alady. Shańyraqtaǵy shyraıly ahýal azamattyń túzde de, úıde de kóńilin jaı etip, mártebesin asqaqtatyp jiberedi. «Eńbekte de, ónerde de az-kem tabysqa jetken bolsam, bul, sóz joq, úıdegi kelinińizdiń arqasy» dep aqtaryla aıtqan lebizine senbesińizge áddińiz joq.
2015 jyly Orazaly aqsaqal men Kámılá áje bastaǵan Mýsınder áýleti oblystyq «Mereıli otbasy» baıqaýyna qatysyp, birinshi oryndy jeńip alǵan edi. Qanat – ata-ájesiniń on besinshi nemeresi. Respýblıkalyq telearnalardyń biri Jezqazǵan ken óndirisi týraly «Qazaq dalasynyń qazynasy» degen derekti fılm túsirdi.
– Meni osy fılmge qazirgi jas býyn jumyskerlerdiń ókili retinde tańdap alǵanyn bilgende keremet qýandym. Fılm keıipkerleriniń biri – Qazaqstannyń Eńbek Eri, kenshi-uńǵylaýshy Tursynbek Maqyshev boldy. Sondaı kisimen qatar turýdyń ózi zor mártebe emes pe? – degen Qanat osyndaı sátter adamnyń jigerin janyp, qaıratyn qaırap eńbekke yntalandyra túsetinin de jasyrmady.
Q.Mýsın byltyr Jezqazǵan qalasy ákimdiginiń jas mamandarǵa arnalǵan «Men – jas qazaqstandyqpyn» baıqaýynda «Úzdik jas óndiris qyzmetkeri» nomınasııasy boıynsha jeńimpaz atandy, óziniń óndiriste ozat ekenin taǵy bir márte dáleldedi.
Jezqazǵan
