Mádenıettiń jetistigi kóp, jeter bıigi odan da asqaq

Keshe ótken Mádenıet mınıstrliginiń keńeıtilgen alqa otyrysynda Mádenıet mınıstri Muhtar Qul-Muhammed salanyń strategııalyq damý josparynyń iske asyrylý barysy jáne aldaǵy kezeńge qoıylatyn mindetteri jaıynda baıandap, Elbasynyń tapsyrmasymen aldaǵy úsh jyldyq merzimge arnalǵan   jumys jospary boıynsha  jyl basynan bergi atqarylǵan is-sharalardyń birsypyrasyna egjeı-tegjeıli toqtalyp ótti. Tórt memlekettik baǵdarla­manyń biri –  Tilderdi qoldaný men damytýdyń 2011-2020 jyl­darǵa arnalǵan memlekettik baǵdarlamasynyń jobasy jasalyp,  jan-jaqty  taldaýdan ótkizilip jatqany, “Mádenıet týraly” Zańnyń jańa normalaryn júzege asyratyn qujattar jınaǵy Úkimet qaraýyna engizilgeni aıtylyp, mádenıet pen ónerdiń ár salasyndaǵy jetistikter jeke-jeke aıshyqty mysaldar arqyly naqtylandy. Máselen, bir ǵana “Mádenı mura” strategııalyq ulttyq jobasy tóńireginde tek kóńil kónshiter tolaıym tabystardy ǵana oıǵa arqaý etýge bolady. Jobanyń ekinshi kezeńinde elimizde – 5,  al shetelden Damaskidegi Sultan Beıbarys kesenesin qalpyna keltirý jumystarynyń múltiksiz aıaqtalýy kúlli qazaqtyń keýdesin shattyq sezimge toltyrǵan qýanyshty habar bolyp jetken edi. Sol sekildi bıyl 19 mádenı oshaqta qalpyna keltirý jumystary júrgizilmek. “Qazaqtyń dástúrli 1000 kúıi” men “Qazaqtyń dástúrli 1000 áni” biregeı jobalarynyń iske asyrylýy ár kezeńdegi mýzykalyq  jaýharlardy qaldyrmaı qamtıtyn tolaıym tabysqa keneltýde. Folklorlyq qazynanyń Qytaı, Mońǵolııa, Reseı, О́zbekstan, Qaraqalpaqstan, Túrkimenstan elderinen jınalýy sala qyzmetkerleriniń bul baǵytta qanshalyqty ter tókkenin ańǵartatyn ekspedısııalyq is ekenin kórsetedi. Ulttyq kınematografııa salasy da damyp keledi. Kınoprokattaǵy otandyq fılmderdiń úlesi josparly túrde artyp,  bıyl “Siz kimsiz, Ka myrza?”, “Sekiris”, “Mahabbat ıirimderi”, “Qyzǵylt qoıan týraly hıkaıa” syndy jańa kartınalardyń tanystyrylymy jurtshylyq tarapynan qoldaý tapty. Teatr ónerine kelsek, jyl basynan beri 24 jańa qoıylym tusaý  kesse, al jańa teatr maýsymynda 27 qoıylymnyń arasynan “Táýelsizdik tolǵaýy” baıqaýynyń jeńimpazy jazýshy, dramatýrg Dýlat Isabekovtiń shyǵarmasy M.Áýezov atyndaǵy memlekettik akademııalyq Qazaq drama teatrynda sahnalanatyny málimdeldi. Sala qyzmetkerleriniń aldynda turǵan aıtýly mindettiń biri elordada ótetin  EQYU Sammıti sheńberindegi konsertke, sondaı-aq qatysýshylar men qonaqtarǵa mádenı baǵdarlamalar uıymdast­yrýǵa qatysty desek, 2011 jyly Islam Konferensııasy Uıymyna Qazaqstannyń tóraǵalyq etýine daıyndyq jumystaryna baı­lanysty “TMD elderindegi ıslamnyń róli” atty halyqaralyq konferensııa uıymdastyrý men ótkizý máseleleri týraly alǵashqy jumys keńesi qazannyń basynda ótetini málim etildi. Qarashash TOQSANBAI.